«Առաջին լրատվական»- ի զրուցակիցն է Արդարադատության նախարար Արտակ Զեյնալյանը:
-Թեև սա ուղիղ առնչություն չունի արդարադատության հետ, բայց միգուցե գիտե՞ք, թե ինչ պատճառով դատարան չեն բերվել Ժիրայր Սեֆիլյանը և նրա ընկերները:
-Այսօր չեմ հասցրել ծանոթանալ լրահոսին, իրադարձությանը տեղյակ չեմ, և նաև չգիտեմ, թե ինչու չեն նրանց ներկայացրել դատարան: Դա կարող եմ իմանալ միայն լրահոսից, որովհետև դատական իշխանությունը ուղղակիորեն Արդարադատության նախարարությանը չի ենթարկվում:
–Մեզ հասած տեղեկություններով՝ ոստիկանությունն ինչ-որ տեխնիկական խնդիր է ունեցել, բայց սա այն դեպքն է, երբ ամեն ինչ կարող ես մտածել: Կարելի՞ է քաղաքական դրդապատճառներով ճաղերի ետևում հայտնված մարդկանց գործը համարել նոր իշխանությունների աքիլլեսյան գարշապարը:
-Կարծում եմ՝ ոչ, որովհետև արդեն նման դեպքեր եղել են, և բավականին փորձ կա կուտակված, մենք պետք է աշխատենք վերցնել այդ փորձի լավագույն օրինակները և թույլ չտանք այն սխալները, որոնք թույլ են տվել աշխարհում, որպեսզի անձինք հայտնվեն ազատության մեջ և միևնույն ժամանակ այլոց իրավունքները չխախտվեն:
-Դուք նշանակվելուց հետո ասել էիք, որ կքննարկվի մի քանի տարբերակ, եթե ինչ-որ քննարկում եղել է, ապա ո՞ր տարբերակն եք հավանական համարում:
-Գիտեք, որ արդեն մի քանի հոգի հայտնվել են ազատության մեջ, խոսվեց այն մասին, որ քննարկվում է նաև համաներման տարբերակը, ինչպես նաև գործերի վերաբացման ժամանակակից մեթոդների կիրառումը՝ նոր երևան եկած հանգամանքով և օգտագործելով Եվրոպական դատարանի և սահմանադրական դատարանի հնարավորությունները: Բոլոր հնարավորությունները քննարկվում են, և ամենայն հավանականությամբ բոլոր տարբերակները համատեղ կօգտագործվեն, որպեսզի կոմպենսացնեն մեկի թերությունները մյուսի առավելություններով:
-Եկեք հասկանանք՝ եթե ընդունենք, որ մարդիկ քաղաքական դրդապատճառներով հետապնդման են ենթարկվել, ապա առաջնահերթ պետք է վերացնել այդ հետապնդո՞ւմը:
-Եթե այդ մարդկանց դատավարությունն ընթանում է, ապա իրավական գնահատական պետք է տա դատարանը, որևէ միջամտություն չի լինելու դատական իշխանության գործունեությանը և դատաքննությանը, իսկ այն դեպքում, եթե արդեն ուժի մեջ մտած դատական ակտ կլինի, պետք է ամեն ինչ անել նախ գնահատելու համար՝ անձինք հանդիսանում են խղճի դատապարտյալ, թե ոչ՝ այն չափորոշիչների համապատասխան, որ տրված են ԵԽ բանաձևում, և հնարավորինս ամեն ինչ անել, որպեսզի նրանք շուտ հայտնվեն ազատության մեջ: Եվ հետագայում նաև չբացառել և ջանքեր գործադրել, որպեսզի գործը վերաբացվի և արդար դատաքննության բոլոր չափանիշների պահպանմամբ իրականացվի դատաքննություն:
–Այսինքն՝ եթե անարդար վճիռ է կայացվի, պետք է նոր դատավարությո՞ւն սկսել:
-Եթե դրա հիմքերը կլինեն, այդ հիմքերի վրա կլինի դատաքննություն, և դատարանը կտա դրա գնահատականը:
–Ենթադրում եմ, որ դրա համար բավականին երկար ժամանակ կպահանջվի:
-Այդ իսկ պատճառով մենք կօգտագործենք հնարավորությունները, որպեսզի մարդիկ հայտնվեն ազատության մեջ:
-Խափանման միջոցը փոխելո՞ւ միջոցով:
-Տարբեր եղանակներով, որից հետո կընթանա արդարացմանը կամ իրավունքների վերականգնմանն ուղղված գործընթացը:
-Դատական համակարգից եկող իմպուլսներից ի՞նչ եք ենթադրում, դատավորները դեռ պատրաստ չե՞ն այս նոր իրողություններում աշխատելու:
-Մեր իմպուլսները գրեթե չեն տարբերվում ձեր ստացած իմպուլսներից. դատարանները Գործադիր իշխանությանը ուղղակիորեն հաշվետու չեն և չպետք է լինեն:
–Դե ասում են, որ նախկինում այդպես չի եղել, դատավորներին հուշել են՝ ինչ պետք է անել, հիմա հուշողը չկա, և շատերը կարծում են, որ հենց դրա պատճառով են դատավորները հայտնվել անորոշության մեջ:
-Մենք մեր ուղերձը հղել ենք դատական իշխանությանը, դատավոներին, որ նրանք ազատ են գործելու օրենքի համապատասխան, ներքին համոզմունքով ու իրենց խղճով և կրելու դրա պատասխանատվությունը:
Մանրամասն՝ տեսանյութում:
