«Հիմնադիր խորհրդարան»-ի առաջնորդ Ժիրայր Սեֆիլյանի գործով վերաքննիչ բողոքի քննությունը հետաձգվեց։ Ամբաստանյալները չէին բերվել դատարան։
Դատարանը հայտարարել է, որ ստացել է Ոստիկանության Երևան քաղաքի վարչության պետ Մարտիրոսյանի գրությունը, ով հայտնել է, որ այս գործով ամբաստանյալների ուղեկցումը հնարավոր չի եղել իրականացնել։
Դատական նիստը մեկ շաբաթով հետաձգվեց, մարդիկ, ովքեր այսօր սպասում էին Ժիրայր Սեֆիլյանի և մյուսների ազատ արձակմանը, այս պահին բողոքի ցույց են իրականացնում մայրաքաղաքի փողոցներում:
Ժիրայր Սեֆիլյանի եղբայրն ասել է, թե տեղի ունեցածը Նիկոլ Փաշինյանի դեմ սաբոտաժ է: Արտաքուստ նման տպավորություն կա, որովհետև Սեֆիլյանի և մյուսների գործով լիարժեք կոնսենսուս է առկա նրա կողմնակիցների և իշխանությունների միջև:
Ենթադրյալ սաբոտաժի հեղինակն, ըստ տրամաբանության, պետք է լինի դատական համակարգը, որը, մեղմ ասած, առայժմ անհաղորդ է մնացել հեղափոխական փոփոխություններին: Սակայն խնդիրն այն է, որ այսօրվա նիստը հետաձգվել է ոչ թե դատարանի զբաղվածության կամ այդ համակարգին առնչվող որևէ կամայական պատճառաբանությամբ, այլ այն բանի հետևանքով, որ ոստիկանությունը չի կարողացել ապահովել ամբաստանյալների ուղեկցումը ՔԿՀ:
Վարչապետի պաշտոնում Նիկոլ Փաշինյանի կադրային առաջին որոշումներից մեկը վերաբերել է ոստիկանությանը և հիմքեր չկան պնդելու, որ այս ծառայությունը հավուր պատշաճի չի վերահսկվում վարչապետի կողմից: Այսինքն, գրեթե անկարելի է ենթադրել, որ ինչ-որ ուժեր կարող էին ոստիկանության միջոցով սաբոտաժի ենթարկել Նիկոլ Փաշինյանին:
Նիստի հետաձգման պատճառը գուցե այն է եղել, որ կառավարության մոտ բացակայել է վստահությունը, թե Վերաքննիչ դատարանն այսօր կվերանայի Սեֆիլյանի և մյուսների խափանման միջոցը և դադար է վերցվել` լուծումներ գտնելու, հասարակական լարումներից խուսափելու համար:
Չի բացառվում, իհարկե, որ գործ ունենք ընդամենը տեխնիկական պատճառների հետ: Դատարանները գերծանրաբեռնված են նիստերով և ոստիկանության համապատասխան ծառայության համար հաճախ ֆիզիկապես դժվար է լինում օրվա ընթացքում բոլոր ամբաստանյալներին դատարան հասցնելը:
Սեֆիլյանի հարազատների և կողմնակիցների ապրումները հասկանալի են, մյուս կողմից` նրանք էլ պետք է գիտակցեն, որ երկրում տեղի են ունենում այլ` տասնյակ դատավարություններ, որոնց ընթացքում նույնպես գործ ունենք մարդկային ճակատագրերի հետ:
