Սյունիքի նախկին մարզպետ Սուրիկ Խաչատրյանի առանձնատան մոտ տեղի ունեցած հունիսմեկյան դեպքի առթիվ հարուցված քրեական գործով դատական հաջորդ նիստը տեղի է ունենալու դեկտեմբերի 16-ին:
Բուդաղյանների պաշտպան, փաստաբան Հայկ Ալումյանն «Առաջին լրատվական»-ի հետ զրույցում նշեց, որ իրենք շարունակում են պայքարել: «Մենք դատարանում ենք, պայքարում ենք: Նախաքննական մարմինը հերթական նիստում նորից նյութերը չներկայացրեց, ընդամենը 270 լրացուցիչ նյութ բերեց, դրան գումարած նաև մինչ այդ բերվածը, և էլի նույն պատմությունը սկսվեց: Մենք իրենցից պահանջում ենք բերել այդ նյութերը, իրենք անընդհատ հղում են կատարում նախաքննական գաղտնիքի վրա, այս պայքարը շարունակվելու է մյուս դատական նիստին»,- ասաց Ալումյանը:
Նրա խոսքով՝ դատավորին ևս անակնկալի է բերել նախաքննական մարմնի պահվածքը, նրան զարմացրել է այն, որ իրենք դատավորի ասելուց հետո էլ նյութերը չէին ներկայացրել: Այս իսկ պատճառով գործի քննությունը հետաձգվել է:
Հիշեցնենք, որ Սյունիքի նախկին մարզպետ Սուրիկ Խաչատրյանի առանձնատան մոտ հունիսի 1-ին Գորիսի բնակիչներ Ավետիք և Արտակ Բուդաղյանների ու Խաչատրյանների ընտանիքի միջև տեղի ունեցած միջադեպի հետևանքով Ավետիք Բուդաղյանը սպանվեց, իսկ նրա եղբայրը՝ Արտակ Բուդաղյանը, և Սուրիկ Խաչատրյանի թիկնապահներից մեկը ստացան հրազենային վնասվածքներ: Նախկին մարզպետի որդին և թիկնապահը կալանավորվել էին, ապա փաստաբան Ռուբեն Սահակյանի միջնորդությամբ նրանց նկատմամբ քրեական հետապնդումը դադարեցվեց, քանի որ, ըստ Սահակյանի, նրանք գործել են ինքնապաշտպանության անհրաժեշտությունից ելնելով: Ավետիք Բուդաղյանի նկատմամբ քրեական հետապնդումը դադարեցվեց նրա մահվան պատճառով: Գործի քննությունը շարունակվում է:
