Լիբանանի խորհրդարանական ընտրություններից հետո Հայ յեղափոխական դաշնակցությունը խորհրդարանում երկու ներկայացուցիչ ունի, ովքեր Լիբանանում գործող «8 Մարտի» ուժի համախոհներն են:
Լիբանանահայ հրապարակախոս Սագո Արեանը «Առաջին լրատվական»-ի հետ զրույցում նշեց, որ այդ ուժը երեկ կազմել է Լիբանանի նոր կառավարությունը:
Արեանը տեղեկացրեց, որ Դաշնակցությունը «Հիզբոլլահ»-ի հետ շատ լավ հարաբերությունների մեջ է և խորհրդարանում աջակցելու է հենց այս ուժին: Ըստ Արեանի, այսօրվա քաղաքական ընդհանուր ենթատեքստից ելնելով՝ Դաշնակցություն-«Հիզբոլլահ» սերտ կապը դրական է. «Հայկական համայնքի քաղաքական ուժերը՝ յուրաքանչյուրը տարբեր ուժերի հետ ունեցած իր հարաբերություններով, հավասարակշռություն են ստեղծել»:
Նշենք, որ Լիբանանի ներկայիս խորհրդարանում հայկական ավանդական մյուս երկու կուսակցությունները՝ Հնչակյանն ու Ռամկավարը, ունեն մեկական ներկայացուցիչ:
Հարցին, թե արդյո՞ք համագործակցում են հայկական ավանդական կուսակցությունները Լիբանանի խորհրդարանում, Արեանը պատասխանեց. «Համագործակցելու ինչ-որ հարթություն չկա, յուրաքանչյուրն իր քաղաքական կողմի և ուղղության ներկայացուցիչ է և պարզապես միմյանց չեն խանգարում: Ընդհանուր առմամբ Լիբանանի հայկական համայնքը միացյալ ճակատով է հանդես գալիս»: