Ճարտարապետների միության նախագահ Մկրտիչ Մինասյանի հավաստմամբ՝ Սպիտակի երկրաշարժի հետևանքով զոհերի թիվը չէր հասնի 25 հազարի, եթե սեյսմիկ ռիսկերը գնահատված լինեին ոչ թե առավելագույնը 7, այլ՝ 9 բալ և ավելի: Շենքերի կառուցման թերացումները հիմնականում եղել են շինարարական աշխատանքների պատճառով, որը մեծ դաս պիտի լինի՝ այժմ շինարարական աշխատանքներ կատարող ընկերությունների համար:
Մկրտիչ Մինասյանն ասաց, որ այսօր արդեն սեյսմակայունության ֆոնը բարձրացված է, սակայն ոչ բոլոր շինարարական կազմակերպություններն են աշխատանքն իրականացնում խիստ հսկողության և հետևողականության ներքո:
Խոսելով խիտ կառուցապատման մասին` նա նշեց, որ իրենք բազմաթիվ անգամ ասել են, որ միայն կայուն շենքեր կառուցելը բավարար չէ ապահովության համար, խիտ կառուցապատումը ևս կարող է հանգեցնել աղետների: Երկրաշարժի դեպքում փլված շենքերի բեկորները թույլ չեն տա կազմակերպել փրկարարական աշխատանքներ. «Այժմ քաղաքում կան տասնվեց, քսանհարկանի շենքեր, նախագծումով նման շենքերի հնարավորություն տրվում է, բայց մեր տարածքի համար որոշում կա, որը 9 հարկից ավել չի թույլատրվում կառուցել»:
Անդրադառնալով երկրաշարժից հետո տուժածներին ցուցաբերված օգնությանը` Մկրտիչ Մինասյանը ընդգծեց, որ այս տարիներին ավելին էր հնարավոր անել. «Քսանհինգ տարի հետո վագոններում մարդիկ պիտի չլինեին, մարդիկ պիտի չլինեին, որ կտուր չունենային, բնակարան չունենային: Շատ դանդաղ են արվում աշխատանքները, ուղղվածություն չկա, որ միանգամից վերջ դրվի այդ հարցերին, քսանհինգ տարին մի ամբողջ սերնդի կյանք է, մարդիկ կան, որ ծնվել են վագոն-տնակներում և 25 տարեկանում էլի նույն վիճակում են»:
Նա հավելեց, որ եթե Գյումրիում մինչև հիմա կա մոտ 5 հազար ընտանիք, որը բնակարան չունի, դա շատ վատ ցուցանիշ է:
