«Հանուն գիտության զարգացման» նախաձեռնության անդամ Դավիթ Պետրոսյանը և նախաձեռնության այլ անդամներ արդեն «ԵՊՀ Ռեստարտ» նախաձեռնության շրջանակներում վաղվանից ԵՊՀ ուսանողներին, դասախոսներին և աշխատակազմի ներկայացուցիչներին դասադուլ և գործադուլ անելու կոչ են անում՝ առաջադրելով 4 պահանջ՝
- ԵՊՀ ռեկտոր Արամ Սիմոնյանի հրաժարական
- Հոգաբարձուների խորհրդի լուծարում
- Ֆինանսական աուդիտի անցկացում
4. ՈՒԽ-ի և արհմիության գործունեության կասեցում:
Նախաձեռնության անդամներից Դավիթ Պետրոսյանը «Առաջին լրատվական»-ի հետ զրույցում ասաց, որ Հայաստանում տեղի է ունեցել թավշյա հեղափոխություն, Հայաստանում տեղի է ունեցել մշակույթի և մտքի հեղափոխություն, և ԵՊՀ-ում տիրող և՛ մթնոլորտը, և՛ իրավիճակը չեն համապատասխանում հեղափոխության հռչակած սկզբունքներին ու արժեքներին. «Մայր բուհի բազմաթիվ խնդիրները՝ կրթության ցածր որակ, կենցաղային ոչ արժանապատիվ պայմաններ, ֆինանսների անարդյունավետ օգտագործում, ակադեմիական միջավայրի բացակայություն, դասախոսների և ուսանողների հետապնդումները քաղաքական հայացքների համար, բուհի և նրա մի շարք կառույցների կուսակցականացվածությունը»։
Դավիթի խոսքով՝ դասադուլի և գործադուլի պահանջը պայմանավորված է ԵՊՀ-ի շուրջ վերջին զարգացումներով ու բացահայտումներով, երբ պարզ դարձավ, որ համալսարանը կառավարվում է ոչ արդյունավետ, տարեկան հսկայական գումարներ են փոխանցվել Համահայկական հիմնադրամին, միլիոնավոր դրամներով սեղան, աթոռ և գործիքներ են գնվել, ինչի համար ռեկտոր Արամ Սիմոնյանը պետք է հրաժարական տա։
Մեր դիտարկմանը՝ հնարավո՞ր է այս տարբերակով հասնել նրան, որ ռեկտորը հրաժարական տա, Դավիթը պատասխանեց. «Մենք ունենք շատ վառ օրինակներ։ Ամենաթարմը Սերժ Սարգսյանի հետ պատահածն է։ Մենք իհարկե Արամ Սիմոնյանին Սերժ Սարգսյանի հետ չենք համեմատում։ Մենք մեր ուժերն ենք գնահատում։ Իսկ մեր ուժը մեր պահանջի փաստարկվածության մեջ է։ Մեր պահանջը լեգիտիմ է»։
Նշենք, որ Արամ Սիմոնյանը ավելի վաղ «Առաջին լրատվական»-ի հետ զրույցում ասել էր, որ չի պատրաստվում հրաժարական տալ, և չի կարծում, թե վարչապետը նպատակ կհետապնդի հեռացնել իրեն։
Առավել մանրամասն՝ տեսանյութում:
