Ռուսաստանի միջկառավարական համաձայնագրերը եվրոպական երկրների հետ, որոնց տարածքով պետք է անցնի «Գազպրոմի» «Հարավային հոսք» գազատարը, չի համապատասխանում ԵՄ օրենսդրությանն ու պետք է լիովին վերանայվի:
Այս մասին չորեքշաթի Եվրախորհրդարանում «Հարավային հոսքին» նվիրված համաժողվի ժամանակ ասել է Եվրահանձնաժողովի ներքին էներգաշուկայի դեպարտամենտի տնօրեն Կլաուս-Դիտեր Բորհարդտը: Խոսքը Բուլղարիայի, Սերբիայի, Հունգարիայի, Սլովենիայի, Խորվաթիայի հետ համաձայնագրերի մասին է: Այս մասին փոխանցում է Vedomosti-ն: Ավստրիան ու Հունաստանը դուրս են եկել նախգծից:
Եթե Ռուսաստանը հրաժարվի, ապա եվրոպական երկրներն անձամբ պետք է դադարեցնեն համաձայնագրերը: Եթե նրանք էլ դա չանեն, ԵՄ-ն նրանց պարտավորեցնելու ուղիներ ու միջոցներ կգտնի՝ սպառնացել է Բորխարդտը:
Ըստ համաձայնագրերի՝ խողովակաշարի պատկանելությունն ու տնօրինությունը կլինի «Գազպրոմինը», հենց նա էլ կսահմանի սակագներն ու միայն ռուսական գազ կմղի «Հարավային հոսքով»: Դա հակասում է ԵՄ օրենսդրությանը՝ հայտարարել է Եվրահանձնաժողովի ներկայացուցիչ Մարլեն Հոլցները:
Նրա խոսքով՝ եվրոպական նորմերը պարտավորեցնում են «Գազպրոմին» դեպի գազատար հասանելիություն ապահովել երրորդ մատակարարների համար, իսկ սակագները պետք է սահմանվեն վերահսկիչ մարմնի հետ համաձայնությամբ:
