Դեկտեմբերի 4-ի երեկոյան ՀՀ ԱԺ նախագահի գլխավորած պատվիրակությունը պաշտոնական այցով ժամանել է Հնդկաստանի Հանրապետություն:
Դեկտեմբերի 5-ին Դելիում ՀՀ ԱԺ նախագահ Հովիկ Աբրահամյանին և պատվիրակության անդամներին ընդունել է Հնդկաստանի Հանրապետության նախագահ Պրանաբ Մուքերջին:
«Ինձ համար մեծ պատիվ է հյուրընկալելու Հայաստանի խորհրդարանի նախագահին և նրա գլխավորած պատվիրակության անդամներին: Վստահ եմ, որ Ձեր պաշտոնական այցը Հնդկաստան կնպաստի մեր երկու երկրների ու ժողովուրդների դարերի խորքից եկող բարեկամության ամրապնդմանը», -ասել է Հնդկաստանի նախագահը:
Նա բարձր է գնահատել երկու երկրների միջև առկա հարաբերությունները և համոզմունք հայտնել, որ ՀՀ Նախագահ Սերժ Սարգսյանի՝ 2014 թվականին նախատեսվող պաշտոնական այցը Հնդկաստան նոր լիցք կհաղորդի Հայաստանի ու Հնդկաստանի քաղաքական և տնտեսական հարաբերություններին:
Նա գոհունակությամբ նշել է, որ միջխորհրդարանական կապերը դինամիկ զարգանում են և կարևոր համարել համագործակցության հետագա խորացումն ու ամրապնդումը, առևտրատնտեսական կապերի զարգացումը:
Շնորհակալություն հայտնելով ջերմ ընդունելության համար` Հովիկ Աբրահամյանը նշել է, որ Հայաստանը բարձր է գնահատում Հնդկաստանի հետ ունեցած իր ջերմ հարաբերությունները և գոհունակությամբ փաստել, որ հայ-հնդկական հարաբերությունները զարգացման նոր փուլ են ապրում համագործակցության տարբեր բնագավառներում:
Նա կարևորել է փոխգործակցության հետագա զարգացումը և խորացումը ինչպես քաղաքական, այնպես էլ տնտեսության, գիտության, կրթության, բարձր տեխնոլոգիաների և այլ ոլորտներում: ԱԺ նախագահը շնորհակալություն է հայտնել միջազգային կազմակերպություններում Հայաստանի համար կենսական նշանակություն ունեցող հարցերի վերաբերյալ Հնդկաստանի հավասարակշռված մոտեցման համար և նշել է, որ Հայաստանը, իր հերթին, վերահաստատում է իր անփոփոխ դիրքորոշումը Քաշմիրի խնդրի վերաբերյալ:
Անդրադառնալով Հայոց ցեղասպանության հարցին` Հովիկ Աբրահամյանը նշել է, որ 2015 թվականին Մեծ եղեռնի 100-րդ տարելիցն է և հույս հայտնել, որ Հնդկաստանի խորհրդարանը կանդրադառնա այդ կարևոր տարելիցին: Պարոն Աբրահամյանը երախտագիտություն է հայտնել հայ համայնքին Հնդկաստանի հասարակական կյանքում ներգրավվելու, վերջինիս նկատմամբ մշտապես ցուցաբերվող պետական հոգածության համար, ինչի շնորհիվ համայնքը պահպանել է իր ազգային ինքնությունն ու մշակութային առանձնահատկությունները:
Հանդիպմանը անդրադարձ է կատարվել տարածաշրջանային խնդիրներին և երկկողմ հետաքրքրություն ներկայացնող այլ հարցերի ևս:
