«Անկախ դատավոր» ՀԿ նախագահ Պարգև Օհանյանի խոսքերով՝ ստեղծված իրավիճակում արտահերթ խորհրդարանական ընտրությունների հնարավորություն չկա։ «Եթե կառավարության ծրագիրը հավանության արժանանա, ապա սահմանադրական ճանապարհով արտահերթ ընտրությունների գնալու ճանապարհ ես չեմ տեսնում։ Թեև Սահմանադրությունը շատ խառն է գրված, բավական իրար հակասող դրույթներ կան»,- ասաց Օհանյանը։
Մեր զրուցակիցը գտնում է, որ արտահերթ ընտրություններ, եթե լինեն, ապա դրանք կարելի է անցկացնել նաև գործող Ընտրական օրենսգրքով։ «Եթե ցուցակները մաքրվեն մեռած հոգիներից, ընտրակաշառքները, ընտրակեղծարարությունները բացառվեն, ապա կարծում եմ, որ կարելի է ժողովրդավարական չափանիշներին համապատասխան ընտրություններ անցկացնել։ Թեև ես կարծում եմ, որ այդ ռեյտինգային ցուցակները նույն մեծամասնական ընտրակարգն է, որը հակասում է Սահմանադրությանը, քանի որ Սահմանադրությունը ամրագրում է, որ Ազգային ժողովը ձևավորվում է բացառապես համամասնական ընտրակարգով։ Սրանից զատ, ես համոզված եմ, որ անգամ եթե ռեյտինգայինն էլ պահպանվի, ապա ժողովուրդն այլևս մականունավորներին ձայն չի տա։ Ինչու պետք է գնան Շմայսին ընտրեն, կամ Սամվել Ալեքսանյանին։ Դրանից բացի՝ եթե ամեն ինչ լավ գնա, ապա նույն մականունավոր բիզնեսմեններն էլ չեն ցանկանա պատգամավոր դառնան, որ տանիք լինեն իրենց բիզնեսի համար։ Եթե բիզնես միջավայրը առողջանա, ապա նրանք կցանկանան միայն բիզնեսով զբաղվել»,- նշեց Օհանյանը։
Նախկին դատավորը փոփոխությունների անհրաժեշտություն է տեսնում նաև դատաիրավական ոլորտում։ «Իմ կարծիքով՝ փոփոխություններ պետք են, գործողները գործող համակարգի մեջ փչացել են։ Այդ համակարգի մեջ հնարավոր չէր լինի մաքուր մնալ»,-ասաց Օհանյանը։
Առավել մանրամասն՝ տեսանյութում։
