Ստամբուլում շարունակվում են պոլսահայ լրագրող, «Ակօս» թերթի հիմնադիր և նախկին խմբագիր Հրանտ Դինքի սպանության գործով դատական լսումները:
Նախօրեին դատարանի որոշմամբ ազատ է արձակվել 85 մեղադրյալներից Շյուքրյու Յըլդըզը, որը Դինքի սպանության ժամանակ Քաղաքացիական վերահսկողության վարչության գլխավոր տեսուչն էր։
Դինքի ընտանիքի փաստաբաններից Հաքան Բաքըրջըօղլուն դատարանին պահանջ է ներկայացրել հարցաքննության կանչել Թուրքիայի հետախուզական կոմիտեի՝ տարածաշրջանային վարչության ղեկավարին։
Հայտնի է նաև, որ դատարանը որոշում է կայացրել դատական նիստերը շարունակել հուլիսի 10-12-ն ընկած ժամանակահատվածում։
Ներկայում Դինքի գործով 85 մեղադրյալներից կալանավորված են մնում 9-ը։ Կալանքի տակ չգտնվող մեղադրյալների թվում է նաև ամերիկաբնակ թուրք կրոնական քարոզիչ Ֆեթուլլահ Գյուլենը, որը Թուրքիայի իշխանությունների պնդմամբ՝ 2016 թվականի հուլիսի 15-ին տեղի ունեցած ռազմական հեղաշրջման փորձի կազմակերպիչն է։
Հիշեցնենք, որ Հրանտ Դինքը սպանվել է 2007 թվականի հունվարի 19-ին՝ խմբագրության առջև:
