ԱԺ անկախ պատգամավոր Էդմոն Մարուքյանը դեկտեմբերի 4-ին ԱԺ-ում կառավարության հետ հարցուպատասխանի ժամանակ հիշեցրեց՝ ժամանակին տեղեկություն կար տարածված, ըստ որի՝ Վանաձորում Գյումրու նման հիմնվելու է տեխնոպարկ, սակայն մինչ այս պահը տեղեկություններ չկան: «Կցանկանայինք հասկանալ՝ ի՞նչ աշխատանքներ են իրականացվում այս պահին, ե՞րբ կլինի տեխնոպարկը»,- հարցրեց նա: Էկոնոմիկայի նախարար Վահրամ Ավանեսյանը նշեց, որ ներկայում աշխատանքներ են իրականացնում երկու հիմնական ուղղութուններով: Նրա խոսքով՝ ցանկացած տեխնոպարկի համար թերևս ավելի կարևոր է նրա բովանդակությունը, նաև լաբորատորիաներ պիտի լինեն:
«Բանակցություններ ենք իրականացնում, այստեղ արդեն իսկ որոշ ընկերություններ համաձայնել են իրենց ներկայությունն ապահովել: Վանաձորում տեխնոպարկը 2016 թվականին կբացվի, դեռ վաղ է խոսել արդյունքների մասին, սակայն մեկ-մեկուկես տարի առաջ պետք է ընկերությունների հետ բանակցություններ սկսել»,- ասաց նա: Նախարարի խոսքով՝ հիմնական աշխատանքներն ավարտելուց հետո մի քիչ այլ քաղաքականություն կունենան, կլինեն այն ընկերությունները, որոնք ցանկություն կունենան այստեղ գործելու:
Մարուքյանը հետաքրքրվեց՝, քանի որ արդեն փորձ կա Գյումրիում, արդյոք նկատված թերությունները, փորձը հաշվի կառնվե՞ն Վանաձորում: Պատգամավորի խոսքով՝ շատ կարևոր է, որ կադրերի վերապատրաստում լինի, բազան ստեղծվի, Վանաձորում գործող կազմակերպությունների հետ համագործակցություն լինի, կադրերի հետ աշխատանքներ տանեն վերապատրաստման, որպեսզի երբ այն ստեղծվի, մարդիկ լինեն, որ աշխատեն ու աշխատեցնեն:
«Մենք իրոք կարիք ունենք մասնագետների, որոնք հենց Վանաձորում կլինեն, դրսից մասնագետներ բերելը շատ թանկ կլինի: Կարևորագույն խնդիրն այն է, որ հնարավորինս ժամանակն օգտագործենք ի օգուտ մեզ, որ շենքը պատրաստ լինելուն պես ունենանք այն կազմակերպությունների ցանկը, որ պիտի աշխատեն»,- ասաց նա:
