Թբիլիսին և Մոսկվան պետք է մտածեն երկխոսությունը վերականգնելու, ոչ թե սահմանի վրա բաժանարար գծերի մասին: Ինչպես հաղորդում է «Նովոստի Գրուզիա»-ն, նման հայտարարությամբ հանդես է եկել ՆԱՏՕ-ի գլխավոր քարտուղար Անդերս Ֆոգ Ռասմուսենը՝ չորեքշաբթի ելույթ ունենալով Դաշինքի մինիստերիալում:
Մինիստերիալի շրջանակներում, որն անցկացվում է Բրյուսելում, այսօր Դաշինքի շտաբ-գրասենյակում տեղի կունենա ՆԱՏՕ-Վրաստան հանձնաժողովի նիստ արտգործնախարարների մակարդակով: Նիստին կքննարկվեն Վրաստանում ժողովրդավարության ընթացիկ գործընթացները և եվրատլանտյան ինտեգրմանն առնչվող հարցեր:
«Վրաստանի և Ռուսաստանի միջև հարաբերությունները նույնն են մնում: Մեր դիրքորոշումն անփոփոխ է. մենք պահանջում ենք հարգել Վրաստանի ամբողջականությունը և ինքնիշխանությունը: Մենք դեմ ենք ցանկացած բաժանարար գծերի: Այժմ ոչ թե բաժանման, այլ կամուրջները վերականգնելու ժամանակն է: Փշալարերի տեղակայման փոխարեն պետք է մտածել երկխոսությունը վերականգնելու մասին»,- հայտարարել է Ռասմուսենը: