Վրաստանի նոր կառավարությունը հասցրել է մեկ տարվա ընթացքում արմատախիլ անել երկրի բանտերում բանտարկյալների հանդեպ կիրառվող կտտանքները և անմարդկային վերաբերմունքը: Ինչպես հաղորդում է «Նովոստի Գրուզիա»-ն, այս մասին հայտարարել է Վրաստանի վարչապետ Իրակլի Ղարիբաշվիլին համաժողովի ժամանակ, որը նվիրված է մարդու իրավունքների պաշտպանության հարցում կառավարության ծրագրերին:
«Մեր իշխանությունը ծանր ժառանգություն է ստացել մարդու իրավունքների պաշտպանության տեսանկյունից: Աշխարհին ցնցեցին բանտարկյալներին կտտանքների ենթարկելու կադրերը: Դա հանցագործություն է, որը, ինչպես խոստովանեցին նախկին իշխանությունները, համակարգի փլուզում էր: Վերջին տարվա ընթացքում մենք կարողացանք ամբողջապես արմատախիլ անել կտտանքները և անմարդկային վերաբերմունքը»,- ասել է Ղարիբաշվիլին: