«Շտապ հավաքի վերաբերյալ հողորդումն այսօր առավոտյան տրվել է և՛ Երևանի քաղաքապետարան, և՛ ոստիկանություն: «Հավաքների ազատության մասին» օրենքի պահանջներին համապատասխան է ներկայացված իրազեկումը»,- «Առաջին լրատվական»-ի հետ զրույցում ասաց Հելսինկյան քաղաքացիական ասամբլեայի Վանաձորի գրասենյակի ղեկավար, իրավապաշտպան Արթուր Սաքունցը՝ անդրադառնալով այսօր ՌԴ նախագահ Վլադիմիր Պուտինի դեմ ուղղված բողոքի ակցիայի ընթացքում ոստիկանության գործողություններին:
«Հաղորդման մեջ նշվել էր և՛ հանրահավաքի, և՛ երթի մասին, այդ թվում՝ նաև երթուղին: Ոստիկանները, սակայն, ոչ թե ապահովեցին երթի մասնակիցների անվտանգ տեղաշարժը, այլ ընդհակառակը՝ իրենք խոչընդոտեցին երթի մասնակիցերի տեղաշարժը»,- նկատեց իրավապաշտպանը:
Սաքունցի խոսքերով՝ միանշանակ է, որ ոստիկանները հրահանգ են ստացել, և հենց հրահանգ տվողներն էլ նույնպես ապօրինի հրահանգ ունեն․ «Մտահոգությունը՝ հերթական անգամ ուզում էին հաճոյանալ Պուտինին, այնպես ինչպես սեպտեմբերի երեքին 5 րոպում Սերժ Սարգսյանը Հայաստանի Հանրապետության անունից որոշում կայացրեց, որ պետք է անդամագրվել Մաքսային միությանը: Հիմա, փաստորեն, այդ հաճոյանքի գործընթացը շարունակվում է»:
Հարցին, թե իր կարծիքով՝ այսօրվա իրադարձությունները, բողոքի ակցիան կհասնե՞ն Պուտինին, Սաքունցը պատասխանեց․ «Իմ նպատակն այն չէ, որ Պուտինին հասնի: Սերժ Սարգսյանն ակնհայտ ապօրինություն է թույլ տալիս և իշխանության իր լիազարությունները շարունակում է օգտագործել ընդդեմ Հայաստանի Հանրապետության քաղաքացիների»:
