Standard & Poor’s միջազգային վարկանիշային գործակալությունը Վրաստանի երկարաժամկետ վարկային վարկանիշը հաստատել է BB- մակարդակի վրա՝ կայուն կանխատեսմամբ: Այս մասին ասվում է գործակալության տարածած հաղորդագրության մեջ՝ փոխանցում է Trend գործակալությունը:
Բացի այդ, ինչպես հայտնում է Վրաստանի էկոնոմիկայի նախարարությունը, երկրի կարճաժամկետ վարկային վարկանիշը հաստատվել է В մակարդակի վրա՝ կայուն կանխատեսմամբ:
Վրաստանի վարկանիշների հաստատումն արտացոլում է գործակալության կարծիքն առ այն, որ քաղաքական իշխանությունների շարունակվող փոփոխումը միջնաժամկետ հեռանկարում կնպաստի բյուջեի ու արտաքին հաշվեկշռի ցուցանիշների կայունացմանը:
«Մենք երկրի տնտեսական աճի հեռանկարները գնահատում ենք լավ, չնայած 2013-ին աճի տեմպերի դանդաղմանը, ինչպես նաև պահպանվող քաղաքական լարվածությանն ու քաղաքական ուղղության անորոշությանը»,- ասվում է գործակալության տարածած մամլո հաղորդագրության մեջ:
Նշվում է, որ վարկանիշների վրա բացասական ճնշում կարող է ցուցաբերել քաղաքական անորոշ իրավիճակի պահպանումը, որն իր հերթին կազդի երկրի տնտեսական աճի վրա:
Վարկանիշների բարձրացումը կարող է պայմանավորված լինել իշխանության սահուն անցման շարունակությամբ և քաղաքականության կանխատեսելիության ու արդյունավետության բարձրացմամբ:
