Ուկրաինայում եվրաինտեգրման մի քանի հազար կողմնակիցները գիշերն անցկացրել են Անկախության հրապարակում՝ իրավապահ մարմինների կողմից հնարավոր գրոհի սպասումով: Ակտիվիստները փայտե ու մետաղյա կոնստրուկցիաներով արգելափակել էին դեպի հրապարակ տանող մուտքերը:
Ցուցարարները միավորվել էին խմբերում՝ իրավապահների կողմից հարձակման դեպքում արագ արձագանքելու համար: Այս մասին հայտնում է ITAR-TASS-ը:
Անկախության հրապարակի տարածքում հիմնվել էր մի քանի տասնյակ վրաններից կազմված ավան: ՈՒԴԱՌ կուսակցության առաջնորդ Վիտալի Կլիչկոն շնորհակալություն է հայտնել ներկաներին քաղաքացիական դիրքորոշման համար՝ նշելով, որ այսօր «բարդ օր» է:
Կիևի քաղաքային վարչակազմի շենքի տարածքում նույնպես շարունակում են ցուցարարներ գտնվել: Կիևի ոստիկանապետ Վալերի Կորյակը խոստացել է, որ իրավապահ մարմինները վարչակազմի շենքն ուժով չեն ազատի:
Կիևի քաղաքային խորհրդի պատգամավոր, ՈՒԴԱՌ խմբակցության անդամ Անդրեյ Ստրաննիկովի խոսքով՝ ժողովրդական պատգամավորներին խորհուրդ են տալիս այսօր աշխատանքի չգնալ:
«Դա կարող է վկայել իրադարձությունների զարգացման երկու տարբերակի մասին՝ կա՛մ մայրաքաղաքի իշխանությունները ելք չեն տեսնում իրավիճակից, կա՛մ ընթանում է «Բերկուտի» կողմից սյունասրահի մաքրման նախապատրաստություն»,- ասել է նա:
