Ժամանակ առ ժամանակ մամուլում հաղորդագրություններ են հայտնվում այնպիսի մարդկանց մասին, ովքեր իբր թե դաստիարակվել են վայրի կենդանիների կողմից, բայց հաճախ այդ պատմությունները մտացածին են լինում: Սակայն Իսպանիայի բնակիչն այնքան համոզիչ է պատմում գայլերի հետ կյանքի մասին, որ նրան հավատում են նույնիսկ գիտնականները:
Երբ 19-ամյա Մարկոս Ռոդրիգես Պանտոհան առաջին անգամ էր հայտնվել տաք ապուրով ափսեի առաջ՝ կորցրել էր իրեն, քանի որ չգիտեր՝ ինչ անել: Դրանում ոչ մի տարօրինակ բան չկար, քանի որ նա 12 տարի ապրել է գայլերի հետ: Այդ մասին հաղորդել է BBC-ն:
Մարկոսի խոսքերով՝ վեց տարեկանում հայրը նրան վաճառել է ծեր հովվի, որը շուտով մահացել է, և նա մնացել է խորթ մոր խնամքին: Նա դաժանաբար ծեծի է ենթարկվել և որոշ ժամանակ անց փախուստ է գործել՝ հեռանալով մարդակային հասարակությունից:
Հովիվ եղած ժամանակ ստացած փորձը բավարար էր ճագարներ որսալու համար: Նա պատմել է, որ մի օր էլ հայտնվել է գայլերի քարանձավում և այդ օրվանից դարձել է այդ կենդանիների ընտանիքի անդամը: Այդ ամենով նրա պատմությունը չի ավարտվել: Նա պատմել է, որ կարողացել է վարժեցնել օձին և դրանով իրեն պաշտպանություն է ապահովել:
Վայրի բնության մեջ տղան ապրել է 12 տարի, իսկ հետո հայտնաբերվել է զինվորների կողմից:
Մարդկային հասարակություն վերադառնալուց հետո 19-ամյա երիտասարդը մեկնել է բանակ: Վերադառնալով՝ մի քանի աշխատատեղ է փոխել, իսկ հետո մուրացկան է դարձել: Որոշ ժամանակ անց նրան հանդիպել է ծանոթ սպաներից մեկը և հրավիրել ապրելու իսպանական գյուղերից մեկում, որը նրա համար տուն է դարձել:
Մարկոսի հետ հաճախ զրուցում են հոգեբաններ, գրողներ, հնագետներ, ովքեր այցելել են այն վայրեր, որոնց մասին պատմել է նա, և եկել են այն եզրակացության, որ Մարկոսի պատմությունների մեծամասնությունը ճշմարտություն է:
