Հայաստանում դեմոգրաֆիական խնդիրը վաղուց է հասել ազգային անվտանգության սպառնալիքի մակարդակի, և այդ հարցում սպառնալիքը կրկնակի է նաև այն առումով, որ դա խորանում է նաև Հայաստանի ռազմավարական գործընկերոջ՝ մեր անվտանգության երաշխավոր դարձած Ռուսաստանի ջանքերով: Այդ անհեթեթ և վտանգավոր գործընկերությանը մենք առիթ ունեցել ենք անդրադառնալու: Այստեղ հանցավոր դիրքը պատկանում է Հայաստանի իշխանությանը, որը ռուսներին թույլ է տալիս դատարկել Հայաստանը:
Եվ շատերին կարող է թվալ, որ սա Հայաստանի իշխանության Ռուսաստանի դեմ անզորության հերթական վկայությունն է: Իրականում նման բան չկա, ոչ մի անզորություն էլ չկա այստեղ: Այստեղ հենց Հայաստանի իշխանության հաշվարկն է` Հայաստանը հնարավորինս դատարկել սոցիալապես անապահով խավերից: Ու ոչ այն պատճառով, որ նրանք գնան Ռուսաստան, աշխատեն և գումար ուղարկեն Հայաստան: Ամենևին, քանի որ գնացողներին ընտանիքներով են տանում, հետ չվերադառնալու պայմանով` տալով Ռուսաստանի քաղաքացիություն:
Խնդիրն այստեղ այլ է, և առավել քան վտանգավոր: Հայաստանի իշխանությունը հերթական անգամ իրեն ազատում է պոտեցիալ դժգոհողներից: Այսինքն՝ իշխանությունները համաձայն են, որ Հայաստանի ժողովուրդը հեռանա այս երկրից, թողնի երկիրը դատարկ, միայն թե իրենք չհեռանան իրենց պաշտոններից:
Մոտ երկու տարի առաջ Հայաստանի կառավարությունը հեշտացրեց վիզային խնդիրը Չինաստանի և Հնդկաստանի հետ հարաբերություններում: Այն ժամանակ հարց էր առաջանում՝ ինչո՞ւ հատկապես այս երկրների:
Հիմա արդեն ամեն ինչ պարզ է՝ բանն այն է, որ այս երկրներում բնակչության աճի տեմպը ուղղակի ֆանտաստիկ է, քանակը՝ մեծ, տարածքը և ռեսուրսները՝ քիչ: Եվ այս երկրներից հաճույքով արդեն գալիս են Հայաստան: Ի վերջո, իրենց երկրում էլ աղքատ են ու սոված, այստեղ էլ կլինեն այդպիսին, բայց գոնե իրար գլխի չեն լցված: Եվ գալիս են հնդիկներն ու չինացիները՝ փոխարինելու Ռուսաստան ուղարկվող հայերին:
Իսկ նրանց համար ստեղծում են աշխատատեղեր, օրինակ՝ Հայաստանի հանքերում չինացի սեփականատերերի կողմից, որոնց վաճառվում են Հայաստանի երկաթի հանքերը: Հայաստանն օտարազգիներով բնակեցնելը նաև մի առավելություն էլ ունի իշխանությունների համար:
Եթե նրանք նույնիսկ սովածությունից բողոքեն էլ, ապա սափրագլուխների ջոկատներին ու ոստիկաններին նրանց վրա ուղղելու դեպքում Հայաստանի իշխանությունները էլ չեն արժանանա սեփական ժողովրդի դեմ զորք հանելու մեղադրանքին:
Շատերին գուցե ֆանտաստիկ թվան նման դատողությունները, բայց տեսեք միտումներն ու արեք եզրակացություններ, և եթե այլ եզրակացությունների ավելի ամուր հիմքեր կան, ապա նոր միայն զարմացեք մեր եզրակացությունների վրա:
Բանն այն է, որ որևէ այլ կերպ դժվար է բացատրել սեփական երկիրը դատարկելու գործընթացին լռելյայն հետևող իշխանությունների վարքը:
