«Այս համակարգը փոխելու հաջողությունը կախված է բացառապես ժողովրդային ճնշումից․ եթե Նիկոլ Փաշինյանին հաջողվի ժողովրդական այս ալիքը կիզակետում պահել ևս մի քանի օր, ինչպես նաև ժողովուրդն էլ իր հերթին այս պայքարը կհամարի իր սեփականը և մինչև վերջ կկանգնի, ապա այս արատավոր համակարգից՝ ոչ միայն ՀՀԿ-ից, այլև այս ամբողջ արատավոր համակարգից ձերբազատվելու երաշխիքները շատ մեծ են»,- «Առաջին լրատվական»-ի հետ զրույցում նման համոզմունք հայտնեց Պահպանողական կուսակցության նախագահ Միքայել Հայրապետյանը՝ անդրադառնալով «Իմ քայլը» նախաձեռնության պայքարի 2-րդ փուլին, որի նպատակը ըստ Նիկոլ Փաշինյանի հայտարարության՝ ՀՀԿ-ի կապիտուլյացիան է։
Նշենք, որ ի պատասխան Նիկոլ Փաշինյանի այն հայտարարության, որ ՀՀ վարչապետի թեկնածու պետք է ընտրվի այն անձը, ում կառաջադրի ժողովուրդը, ապրիլի 25-ին լրագրողների հետ հանդիպման ժամանակ Կարեն Կարապետյանը հակադարձեց, թե «փողոցում վարչապետ չեն ընտրում»։
Անդրադառնալով Կարեն Կարապետյանի այս հայտարարությանը՝ Միքայել Հայրապետյանը շեշտեց․
«Կարեն Կարապետյանի ամենից մեծ անամոթությունը գալիս է ռուսական կրթությունից կամ նրա գավառական խորամանկությունից, երբ Նիկոլ Փաշինյանի և տասնյակ հազարավոր քաղաքացիների պահանջը ձևախեղում է՝ իր ձևախեղված մտածողությանը համապատասխան․ Ազգային ժողովը ժողովրդի կամքն իրացնողն է, այդ կամքն օրինական հիմքերով կատարողն է։ Այո, ժողովուրդը, հրապարակում հավաքված բազմահազարանոց զանգվածը իր թեկնածուին կառաջադրի և դրա իրականացման իրավունքը, բնականաբար, պատկանում է ԱԺ-ին և պարոն Փաշինյանն էլ դրանից տարբերվող բան բացարձակապես չի ասել, այլ բան է, որ Կարեն Կարապետյանը խարդավանքի է դիմում կամ ինչպես ինքն է սիրում ժարգոնային բառեր օգտագործել՝ մուտիլովշիկ է Կարեն Կարապետյանը, երբ որ փորձում է այդպես գավառական բառախաղ անել։ Ժողովուրդն իրավունք ունի՝ և բարոյական և իրավական ճնշում գործադրելու իր 10․000 դրամանոց ընտրյալների կամ չընտրյալների վրա՝ իրենց ուզած թեկնածուի օգտին քվեարկելու համար, մեր օրենսդրությունը դա ապահովում է, իսկ Կարեն Կարապետյանը ընդամենը մի հատ փոքրիկ պեշկա է, որին ուղղակի ցույց են տալիս, բայց այս ամբողջ պայքարը, հավանաբար, նրա համար չէ և Կարեն Կարապետյանն ուղղակի ոտքի տակ է ընկնում, նա պետք է վերադառնա այնտեղ, որտեղից եկել է, որովհետև Հայաստանում նա անելիք չունի»։
Մանրամասները՝ տեսանյութում։