Աֆղանստանն ունակ չէ միայնակ հաղթահարել երկրում թմրանյութերի արտադրության խնդիրը: Դրա համար անհրաժեշտ է միջազգային հանրության ջանքերի ակտիվացում: Այս մասին հայտնել է Աֆղանստանի հարցով ՄԱԿ-ի գլխավոր քարտուղարի հատուկ ներկայացուցիչ Յան Կուբիշը Դուշանբեում տարածաշրջանի երկրների հակաթմրանյութային կառույցների ներկայացուցիչների ոչ պաշտոնական միջազգային հանդիպմանը: Այս մասին հայտնում է ITAR-TASS-ը:
Կուբիշը փաստել է, որ Աֆղանստանում թմրանյութերի արտադրությանն առնչվող իրավիճակը շարունակում է բարդ լինել, ավելին՝ երրորդ տարին անընդմեջ դիտվում է ափիոնի հումքի արտադրության աճ: Դիվանագետի խոսքով՝ դա վկայում է այն մասին, որ միջազգային հանրությունը դեռևս չի հաղթահարել հանձնառությունը, և որ ավելի արդյունավետ միջոցառումներ են պետք:
Թմրանյութերի անօրինական շրջանառության դեմ պայքարում միջազգային հանրության ջանքերի միավորման անհրաժեշտության մասին ասվում է Տաջիկստանի նախագահ Էմոմալի Ռահմոնի ուղերձում, որն ընթերցել է հանրապետության Անվտանգության խորհրդի քարտուղար Աբդուրահիմ Կախարովը: Ռահմոնը վստահություն է հայտնել, որ հանդիպմանը արդյունավետ միջոցառումներ կմշակվեն թմրանյութերիի տարածման դեմ պայքարում:
Հանդիպմանը մասնակցում են Աֆղանստանի, Իրանի, Պակիստանի, Ղրղըզստանի, Ղազախստանի, Տաջիկստանի, Թուրքմենստանի, Ուզբեկստանի, Չինաստանի, ԱՄՆ-ի, Թուրքիայի հակաթմրանյութային կառույցների ղեկավարները, ինչպես նաև Թմրանյութերի ու հանցավորության հարցերով ՄԱԿ-ի վարչության ու ԵՄ ներկայացուցիչները:
Նման ձևաչափով հանդիպում անցկացվում է առաջին անգամ: Քննարկումների արդյունքում համատեղ հայտարարություն կընդունվի:
