«Արևելյան գործընկերության» գագաթնաժողովում անհաջողությունից հետո ԵՄ-ն տեղափոխել է Ուկրաինայի հետ Ասոցացման համաձայնագրի ստորագրման ժամկետը 2014-ի սկզբին Բրյուսելում կայանալիք ԵՄ-Ուկրաինա գագաթնաժողով: Այս մասին ITAR-TASS-ին հայտնել է բարձրաստիճան դիվանագիտական աղբյուրը:
«Ուկրաինայի ղեկավարության որոշումը մեծ անհաջողություն է այդ երկրի համար: Սակայն ԵՄ-ն իր դռները բաց է թողնում,-ասել է նա:- Այդ համաձայնագրի ստորագրման հաջորդ պահը կարող է դառնալ ԵՄ-Ուկրաինա գագաթնաժողովը, որը տեղի կունենա Բրյուսելում՝ 2014-ի փետրվարին կամ մարտին»:
Նրա խոսքով՝ մեծ հավանականությամբ մինչ այդ կերկարացվի Ուկրաինայում արդարադատության նկատմամբ վերահսկողության համար Եվրախորհրդարանի առաքելության մանդատը՝ Կոքսի և Կվասնևսկու գլխավորությամբ: Այդ առաքելությունը ստեղծվել է 2012-ին:
Նա նշել է, որ համաձայնագրի ստորագրումը հնարավոր կլինի բացառապես այն դեպքում, երբ Ուկրաինան կատարի բոլոր պահանջները:
Խոսելով Ուկրաինայի անդամակցության հեռանկարների մասին՝ դիվանագետն ասել է. «Մենք Ուկրաինային առաջարկում ենք իրական հեռանկար՝ համատեղ տնտեսական տարածքի ստեղծում, մասնակցություն եվրոպական ծրագրերին, շարժում եվրոպական արժեքների ուղղությամբ»: Միևնույն ժամանակ նա խոստովանել է, որ Ասոցացման հանաձայնագրով չի նախատեսվում Ուկրաինայի անդամակցության հարց:
Դիվանագետը նաև կասկած է հայտնել, որ ԵՄ-ն կներառի Ռուսաստանին բանակցային գործընթաց, ինչը աննախադեպ պահանջ է, քանի որ ասոցացումը երկկողմ գործընթաց է: Նա նշել է, որ եթե Կիևը շարունակի պնդել, կարող է ստեղծվել տնտեսական հարցով խորհրդակցությունների որևէ զուգահեռ ձևաչափ:
