«Մերժիր Սերժին» կարգախոսով ակցիա է տեղի ունեցել նաև Ուկրաինայի մայրաքաղաք Կիևում՝ ՀՀ դեսպանատան առաջ։
Հայաստանի մի խումբ քաղաքացիներ «Իմ քայլը», «Մերժիր Սերժին» «Ժողովրդավարության մեջ բռնապես չի կարող լինել» գրությամբ պաստառներ են պարզել դեսպանատան առաջ և վանկարկել։
Ակցիայի մասնակիցներից Աննա Սիմոնյանը «Առաջին լրատվական»-ի հետ զրույցում ասաց, որ իրենք իրենց այդ քայլով իրենց համերաշխությունն են հայտնում Հայաստանում տեղի ունեցող զարգացումներին և այդպիսով միանում են պայքարին։ «Մենք այսպիսով մեր քայլն ենք անում, որպես Հայաստանի հպարտ քաղաքացիներ։ Թող բոլորը դուրս գան փողոց, կանգնեն իրենց ժողովրդի կողքին։ Կիևում ոչ միայն սերժամետ երիտասարդներ են, հայություն կա, այլև իր իրավունքները իմացող, պահանջատեր ՀՀ քաղաքացիներ։ Մենք կողմնակից ենք խաղաղ ցույցերին և կոչ ենք անում, որպեսզի ոչ մի դեպքում խաղաղ ցուցարարների նկատմամբ ուժ չկիրառվի»,-ասաց Աննա Սիմոնյանը։
Ակցիայի մասնակից Դավիթ Հարությունյանն էլ ընդգծեց, որ ուկրաինական սփյուռքը Հայաստանի ցուցարարների կողքին է, իրենք էլ են մերժում Սերժ Սարգսյանին և կոչով դիմեց Հայաստանի ցուցարարներին՝ անել ամեն ինչ նպատակին հասնելու համար:
Դավիթը նշեց, որ Կիևում ՀՀ դեսպանատան առաջ կազմակերպված ակցիային մասնակցել են նաև մի քանի այլ երկրների քաղաքացիներ, ովքեր ծանոթանալով ակցիայի բովանդակությանը և գիտակցելով, թե որքան կարևոր է պայքարը հանուն մարդու իրավունքների՝ միացել են իրենց ակցիային։
