Forbes-ի նախկին լրագրող Ջոնաթան Գրինբերգը հայտարարել է, որ 1984 թվականին ԱՄՆ ներկայիս նախագահ Դոնալդ Թրամփը ձևացել է որպես իր իսկ պաշտոնական ներկայացուցիչ և ստել իր ունեցվածքի մասին՝ Միացյալ Նահանգների 400 ամենահարուստ մարդկանց ցուցակում հայտնվելու համար: Այդ մասին Գրինբերգը գրել է The Washington Post թերթում:
Հեղինակը նշում է, որ 1984 թվականի մայիսին իրեն զանգահարել է մեկը, ով ներկայացել է որպես Թրամփի պաշտոնական ներկայացուցիչ Trump Organization շինարարական ընկերությունից: Նա ներկայացել է որպես Ջոն Բերոն և ասել, որ Թրամփը իրականում շատ ավելի հարուստ է, քան դրա մասին գիտեն լրագրողները:
«Trump Organization-ի մեծ մասը պատկանում է պարոն Թրամփին: Դուք կարծում եք, որ ընկերության կեսը պատկանում է Ֆրեդ Թրամփին, բայց ես համարում եմ, որ հիմա դուք կարող եք սեփականատեր համարել Դոնալդ Թրամփին»,- ասել է Բերոնը:
Վերջերս Գրինբերգը հասկացել է, որ Բերոնի ձայնը շատ նման է Թրամփի ձայնին, ինչին ի ապացույց նա բերում է հարցազրույցի ձայնագրությունը: Նշվում է նաև, որ Թրամփը մեկ անգամ չէ, որ որպես մականուն է օգտագործել Ջոն Բերոն անունը:
Լրագրողը նշել է, որ 1982 թվականին Թրամփը 100 մլն դոլարի չափով կարողությամբ ներառվել է Forbes-ի ցուցակում, սակայն իրականում նա ունեցել է 5 մլն դոլար: