Վարչապետ Տիգրան Սարգսյանն այսօր ընդունել է Ռուսաստանի Դաշնության ռազմատեխնիկական համագործակցության դաշնային ծառայության տնօրենի տեղակալ, հայ-ռուսական ռազմատեխնիկական համագործակցության միջկառավարական հանձնաժողովի ռուսական կողմի համանախագահ Կոնստանտին Բիրյուլինին: Այս մասին «Առաջին լրատվական»-ը տեղեկանում է ՀՀ կառավարության պաշտոնական կայքէջից:
Նա Հայաստան է ժամանել ս.թ. նոյեմբերի 25-29-ը Երևանում անցկացվող հանձնաժողովի 8-րդ նիստի շրջանակում: Հանձնաժողովի հայկական կողմի համանախագահն է ՀՀ պաշտպանության նախարարի տեղակալ Ալիկ Միրզաբեկյանը:
«Հայաստանն առանձնակի կարևորություն է տալիս հայ-ռուսական ռազմատեխնիկական համագործակցությանը և շահագրգռված է խորացնել այն», – նշել է վարչապետ Սարգսյանը և բարձր գնահատել պարոն Բիրյուլինի անձնական ներդրումը երկկողմ ռազմատեխնիկական հարաբերությունների ամրապնդման գործում:
Իր հերթին Կոնստանտին Բիրյուլինն ընդգծել է, որ Ռուսաստանը կարևորում է Հայաստանի հետ ռազմատեխնիկական գործակցությունը և քայլեր է ձեռնարկում այն զարգացնելու ուղղությամբ:
Զրուցակիցները քննարկել են Հայաստանի և Ռուսաստանի միջև ռազմատեխնիկական գործակցության ընթացքին և ընդլայնմանը վերաբերող հարցեր: Կոնստանտին Բիրյուլինը և Ալիկ Միրզաբեկյանը վարչապետին են ներկայացրել հայ-ռուսական ռազմատեխնիկական համագործակցության միջկառավարական հանձնաժողովի 8-րդ նիստի աշխատանքների արդյունքները:
Նշվել է, որ առկա է լիարժեք փոխըմբռնում ձեռք բերված պայմանավորվածությունների իրագործման հարցում
