«Ազատություն» ռադիոկայանի փոխանցմամբ՝ ընդդիմադիր ակտիվիստ Տիգրան Առաքելյանը, ինչպես նաև 2011 թվականի օգոստոսի 9-ի գործով դատապարտված մյուս ակտիվիստները՝ Սարգիս Գևորգյանը, Դավիթ Քիրամիջյանը և Արտակ Կարապետյանը, բողոք են ներկայացրել Վճռաբեկ դատարան:
Պահանջն է՝ բեկանել Վերաքննիչ քրեական դատարանի որոշումը և ընդդիմադիրներին արդարացնել:
Այս գործով ծանր մեղադրանքով ավելի քան 2 տարի բանտում մնացած և հոկտեմբերի 14-ին ազատ արձակված Տիգրան Առաքելյանը Վերաքննիչ դատարանի որոշմամբ անմեղ էր ճանաչվել միայն ոստիկանի նկատմամբ վտանգավոր բռնություն գործադրելու մասով, դատարանը նրան արդարացրել էր հանցակազմի բացակայության պատճառով: Իսկ ոստիկանի նկատմամբ ոչ վտանգավոր բռնություն գործադրելու և դիմադրություն ցույց տալով՝ խուլիգանության մեջ մեղավոր ճանաչելով՝ Վերաքննիչը նրան դատապարտել էր 3 տարով և համաներմամբ ազատել պատժից:
«Շատ կոնկրետ խաղ էին իրենք խաղում, մյուս երեք տղաներին պահել էին դրսում, ամեն վայրկյան հետ բերելու սպառնալիքի տակ, իսկ ինձ ուղղակի ազատ չէին արձակում: Խնդիրը հստակ իրենք լուծեցին ներքաղաքական», – «Ազատության» հետ զրույցում մեկնաբանել է Տիգրան Առաքելյանը:
Տիգրան Առաքելյանի պաշտպանը Վճռաբեկ բողոքի մեջ վկայակոչել է Վերաքննիչ դատարանի մի շարք դատական սխալներ, իրավունքի բազմաթիվ խախտումներ: Պաշտպանը, մասնավորապես, նշել է, որ օգոստոսի 9-ի միջադեպի հետևանքով մեղադրված երիտասարդների արարքները գնահատելիս Վերաքննիչ դատարանը ակնհայտորեն սխալ է կիրառել քրեական օրենքի նորմերը: Ըստ բողոքի՝ «իրենց նկատմամբ կիրառված բռնությանն ի պատասխան ամբաստանյալները դիմել են անհրաժեշտ ինքնապաշտպանության, և դա ուղղակիորեն բացառում է նրանց գործողությունները հանցագործություն համարելը»: Սակայն «այս փաստարկը գնահատելիս Վերաքննիչ քրեական դատարանը որևէ գնահատական չի տվել ոստիկանության աշխատակիցների գործողությունների անօրինականության մասին ամբաստանյալների, ինչպես նաև վկաների բացատրություններին և պաշտպանության կողմի դիրքորոշմանը»,- վճռաբեկ բողոքի մեջ գրել է փաստաբանը՝ հիշեցնելով, որ Վերաքննիչ քրեական դատարանում քննության առարկա չի դարձել ոստիկանական ավտոմեքենայով Տիգրան Առաքելյանի տեղափոխման անմարդկային պայմանները, նրա նկատմամբ ուժի կիրառման, մասնավորապես առանց որևէ անհրաժեշտության ուղղակի խեղդելու աստիճան ֆիզիկական ներգործության հարցը: Ըստ բողոքի, «այդ գործողությունների հեղինակ ոստիկանը, որը ստացել էր տուժողի կարգավիճակ, փոքր-ինչ օբյեկտիվ քննության արդյունքում կարող էր հեշտությամբ և հաջողությամբ նստել ամբաստանյալի աթոռին»:
Մանրամասները՝ «Ազատություն» ռադիոկայանի կայքէջում
