ԵԽԽՎ որոշումը՝ երկու տարի Վրաստանում նիստեր չանցկացնելու մասին, չի նշանակում Թբիլիսիի հետ հարաբերությունների ավարտ: Ինչպես հաղորդում է RIA Novosti-ն, այս մասին հայտարարել է Վրաստանի արտգործնախարար Մայա Փանջիկիձեն:
Նախորդ շաբաթ ԵԽԽՎ կայքում հրապարակվել էր հաղորդագրություն, ըստ որի՝ վեհաժողովը երկու տարի նիստ չի անցկացնի Վրաստանի տարածքում: Նման որոշում կայացվել է այն բանից հետո, երբ Վրաստանի իշխանությունները հրաժարվեցին թույլ տալ ԵԽԽՎ դիտորդական առաքելության ռուս պատգամավորին հետևել նախագահական ընտրություններին, քանի որ նախկինում այցելել էր Աբխազիա՝ առանց Թբիլիսիի արտոնության:
«Օրենքը, ըստ որի՝ ռուս պատգամավորին թույլ չեն տվել մուտք գործել Վրաստան, ընդունվել է Վրաստանի խորհրդարանի կողմից, և բոլորը պետք է հարգեն վրացական օրենսդրությունը»,- ասել է Փանջիկիձեն:
Նա նշել է, որ Եվրոպայի խորհուրդը նախկինում ևս սահմանել է նման պատժամիջոց Վրաստանի հանդեպ, ինչը չի նշանակում, որ պատժամիջոցի գործողության ընթացքում Եվրոպայի խորհրդի և Վրաստանի միջև համագործակցությունն ավարտվում է:
«Դա վերաբերում է միայն վեհաժողովի կոմիտեներին, այլ ոչ թե Վրաստանի և ԵԽ-ի հարաբերությունների այլ ձևաչափերին»,- ընդգծել է նա:
