«Կովկաս» ինստիտուտի տնօրեն, քաղաքագետ Ալեքսանդր Իսկանդարյանը համաձայն չէ այն դիտարկումների հետ, որ Սերժ Սարգսյանը որոշել է վարչապետ դառնալ դեռ սահմանադրական փոփոխություններից առաջ. «Ես տարածված կարծիքների հետ համաձայն չեմ, ըստ իս՝ իսկապես անկացվում էր քասթինգ, տարբերակներ կային, և այդ քասթինգն անցկացվում էր 6 ամսից ավելի։ Կարծում եմ՝ պարոն Կարապետյանին իսկապես առաջարկվել էր վարչապետ աշխատել մինչև այս ժամանակահատվածը, բայց թե ինչպիսի զարգացումներ կլինեին ապագայում, չեմ կարծում, թե ի սկզբանե որոշված չէին։ Ոչ ոք Սերժ Սարգսյանի լեզվից չէր քաշում ու նա կարող էր և չասել, որ չի պատրաստվում վարչապետ դառնալ»,- «Առաջին լրատվական»-ի հետ զրույցում ասաց Իսկանդարյանը։
Մեր զրուցակիցը նաև չի կարծում, թե ընդդեմ Սարգսյանի վարչապետության բողոքի ակցիաները կարող են հաջողություն գրանցել. «Քաղաքական իրավիճակը փոխելու ռեսուրս չկա, խաղը խաղացվել է խորհրդարանական ընտրությունների ժամանակ։ Այն, ինչ հիմա է տեղի ունենում՝ ընտրություն չէ, նշանակում է։ Ընտրությունը կատարվել է խորհրդարանի ընտրությունների ժամանակ, երբ ՀՀԿ-ն մեծամասնություն ստացավ։ Այդ մարդիկ ճանաչել են ընտրությունների արդյունքները ու գնացել նստել խորհրդարանում։ Կարծում եմ՝ հիմա պարզապես աղմկոտ միջոցառումներ կանցկացվեն, հիմա էլ աղմկոտ է՝ անգամ խորհրդարանում հրավառություն եղավ։ Բայց որպեսզի քաղաքական իրավիճակ փոխվի, անհրաժեշտ են այնպիսի ռեսուրսներ, որոնք այսօր ընդդիմությունը չունի»,- ընդգծեց Ալեքսանդր Իսկանդարյանը։
Ի՞նչ ճակատագիր է սպասվում «Ելք» դաշինքին, արդյո՞ք կփլուզվի, հարցին ի պատասխան Իսկանդարյանն ասաց. «Իսկ արդյոք կա ընդհանուր «Ելք», Աստված վկա՝ ես նման բան երբեք չեմ ասել իմ մեկնաբանություններում։ Դա նույնպես պատահականություն չէ, պատահական չէ, որ այդ մարդիկ իրար հետ չեն կարող պայմանավորվել։ Հայաստանում շատ տարբեր մարդիկ իրար հետ չեն կարողանում պայմանավորվել ավելի քան 25 տարի։ Իմ մասնագիտությունից ելնելով ես շատ հարգում եմ հայաստանյան քաղաքական էլիտային՝ թե՛ իշխանությանը և թե՛ ընդդիմությանը։ Հավատալ, որ Հայաստանում 14 տարեկանից բարձր մարդ կա, որը կհավատա, որ Հայաստանը կարող է ԵԱՏՄ-ից դուրս գալ՝ ես չեմ կարող։ Մարդիկ, ովքեր լրջորեն նման բան եմ մտածում՝ գոյություն ունենալ չեն կարող, բայց խոսում են չէ՞ նման բան։ Դժվար թե որևէ մեկը լրջորեն հավատա, որ կոյուղաջրով տարրան մի սենյակից մյուս սենյակ տեղափոխելով կարող են էս երկիրը ղեկավարել»։
Հարցազրույցն ամբողջությամբ՝ տեսանյութում։
