ԱԺ Հանրապետական խմբակցության պատգամավոր Մարգարիտ Եսայանը վստահեցնում է՝ իշխանությունը մտավախություն չունի, որ իր դեմ զենք կկիրառվի, բայց ամեն դեպքում զգուշությունը լավ բան է, և այդ պատճառով է ոստիկանությունը հաղորդագրություն տարածել, որում ասվում է, որ խաղաղ, առանց զենքի, բնականոն հավաքը կստանա ոստիկանության անվերապահ աջակցությունը, կերաշխավորվեն հավաքի բոլոր մասնակիցների՝ հավաքի ազատության իրավունքն ու անվտանգությունը։
«Եվ կարծում եմ, որ ոստիկանությունը օգտվել է օրենքով իրեն վերապահված իրավունքից և զգուշացրել է, որ ինքը պատրաստ է կանգնել երթի խաղաղ մասնակիցների կողքին և ապահովել նրանց անվտանգությունը, և Աստված չանի, որ նման բան լինի (զենք կիրառվի)։ Ես, լինելով անուղղելի լավատես, վստահ եմ, որ նման բան չի լինի, և հույս ունեմ, որ ավելի սթափ են մեր այն գործիչները, որոնք այս երթերը և մնացածը կազմակերպում են։ Պարզապես մարդիկ ասելիք ունեն և իրենց ասելիքն են արտահայտում»։
Մարգարիտ Եսայանը ընդգծեց, որ ոստիկանությունը երբեք խաղաղ ցուցարարի նկատմամբ ուժ չի կիրառի, ըստ նրա՝ 2008թ.-ի մարտի 1-ի պարագայում էլ շատ վիճելի է՝ ցուցարարները խաղա՞ղ էին, թե՞ ոչ։
Անդրադառնալով հարցին, թե ինչ կանի, եթե Սերժ Սարգսյանի վարչապետության դեմ պայքարողները շրջափակեն իրենց տունը՝ փորձելով ազդել խորհրդարանում իրենց վարչապետի թեկնածուին քվեարկելու հանգամանքի վրա, Մարգարիտ Եսայանը ասաց, որ իրենց տան դիրքը այնպիսին է, որ հնարավոր չի լինի շրջափակել, բայց ամեն դեպքում տուն կհրավիրի, կառաջարկի սուրճ և կբացատրի, որ իրենց ընտրած ճանապարհը հակասահմանադրական է։
«ԱԺ-ի, 105 պատգամավորների տներ շրջափակելն անհնարին է, անչափելի ռեսուրսներ են հարկավոր. մենք ՀՀ-ում այդ ռեսուրսները չունենք, ինչպես նաև ընդդիմադիրները չունեն այդ ռեսուրսները։ Դա երազանքի ժանրից է, մի տեսակ մանկական զվարճանք է հիշեցնում, ինչպես նաև երեկ դահլիճում ծուխը»,- նկատեց նա։
Մանրամասները՝ տեսանյութում:
