Ֆրանսիական «Յառաջ» պարբերականի փոխանցմամբ՝ թուրքական «Հուրիյեթ» թերթը նոյեմբեր 22-ին գրել է, թե փաստաբան Ալի Էլբեյօղլուն ձեռնարկել է հայերի կողմից լքված գույքերին նվիրված նոր գրքի հրատարակման գործը: Նա այս աշխատասիրության համար ստացել է տոմարները ուսումնասիրելու խորհրդարանական արտոնություն:
Էլբեյօղլուն հայտարարել է, թե ուսումնասիրել է «Էմվալ-ի Մեդրուքե» օրենքին վերաբերող թուրքական և օսմանյան թղթածրարները: «Էմվալ-ի Մեդրուքե»-ն այն օրենքն է, որ 1915-ի Ցեղասպանությունից հետո «կարգավորում է» հայերի կողմից լքված գույքերին վերաբերող իրավունքները:
Հեղինակը հավելել է նաև, որ այդ նպատակով անհրաժեշտ է մինչև 500 տարի հետահայաց պրպտումներ կատարել՝ հավաստիացնելով նաև, թե փաստաթղթերը շատ լավ պահպանված են:
Ինչ վերաբերում է այդ գույքերի բուն տերերի հետնորդների կողմից դրանք ստանալու նպատակով դատական հետապնդումների հավանականությանը, փաստաբանն ասել է, որ նման քայլերի շատ հաճախ դիմում են Թուրքիայի սահմաններից դուրս, հետևաբար դրանք մնում են «անստանալի»: Էլբեյօղլուն որպես օրինակ բերել է սփյուռքահայ այն ընտանիքի բացած դատը, որը պահանջում էր վերադարձնել իր պապերին պատկանած Ադանայի հողերը, որտեղ այսօր կառուցվել է Ինճիրլիքի ամերիկյան խարիսխը:
Նրա խոսքով՝ այդ դատը կարող էր դրական ելք ունենալ, եթե ձեռնարկված լիներ Թուրքիայում:
