The Guardian բրիտանական թերթը ստացել է Liberty իրավապաշտպան խմբի մրցանակը՝ Մեծ Բրիտանիայի և ԱՄՆ-ի հատուկծառայությունների կողմից իրականացվող լրտեսումների մասին նյութերի շարքի համար: Այս մասին հաղորդում է պարբերականի կայքը:
Թերթը մրցանակի է արժանացել Independent Voice of the Year անվանակարգում: Ինչպես նշել են միջոցառման կազմակերպիչները՝ The Guardian-ը մեծ խիզախություն է ցուցաբերել՝ պատմելով այն, ինչի մասին մյուսները լռում էին:
«Տոտալ լրտեսության ենթակառուցվածքը, որն իրականացվել է մեր թիկունքում և առանց մեր իմացության. ահա թե առաջին հերթին ինչն է անհանգստացրել փաստաթղթերը մեզ փոխանցած Էդվարդ Սնոուդենին և մեզ: Այդ ամենը պետք է դառնար հասարակության քննարկման առարկա: Մենք ուրախ ենք, որ կարողացել ենք սկսել այդ քննարկումը»,- հայտարարել է թերթի գլխավոր խմբագիր Ալան Ռասբրիջերը:
Իրավապաշտպանների մրցանակին են արժանացել նաև Քերոլայն Կրիադո-Փերեզը, որը կազմակերպել է արշավ, որպեսզի բրիտանական թղթադրամների վրա կրկին հայտնվեն հայտնի կանանց դիմանկարները, և Դորին Լորենսը, որը երկար տարիներ փորձում էր հասնել այն բանին, որ իրավապահ մարմինները հետաքննեն իր որդու մահը:
