Երևանում, ապրիլի 2-ին, արտակարգ դեպք է տեղի ունեցել. ժամը 17։00-ի սահմաններում ոստիկանության Երևան քաղաքի վարչության ծառայողները Թումանյան փողոցի և Հյուսիսային պողոտայի խաչմերուկից ոստիկանության կենտրոնական բաժին են բերման ենթարկել Երևան քաղաքի Ավան վարչական շրջանի բնակիչ՝ 24-ամյա Վլադիմիր Պ.-ին։
Shamshyan.com-ի փոխանցմամբ, ոստիկաններն այնուհետև կենտրոնական բաժին են հրավիրել Երևանի բնակիչներ՝ 27-ամյա Մարգարիտա Ղ.-ին և 23-ամյա Մարգարիտա Պ.-ին։
Աղբյուրի տեղեկություններով՝ նույն օրը, ժամը 16։30-ի սահմաններում Թումանյան և Կողբացու փողոցների խաչմերուկում ուսով միմյանց դիտավորյալ հարվածելու պատճառով աղջիկներից մեկը վիրավորել է Վլադիմիր Պ.-ին, վերջինս էլ բացահայտ անհարգալից վերաբերմունք է ցուցաբերել հասարակության նկատմամբ և դիտավորությամբ կոպիտ կերպով խախտել հասարակական կարգը, որի ժամանակ էլ նա իր մոտ եղած «Բերետա» տիպի օդամղիչ ատրճանակով կրակոցներ է արձակել Մարգարիտա Ղ.-ի և Մարգարիտա Պ.-ի ուղղությամբ։
Կրակոցների արդյունքում Մարգարիտա Ղ.-ն ստացել է մարմնական վնասվածք։ Ոստիկանները հայտնաբերել են նաև նշված ատրճանակը։
Վլադիմիր Պ.-ն ստորագրությամբ բաց է թողնվել։
Աղբյուրի տեղեկություններով՝ վիրավոր Մարգարիտա Ղ.-ն աշխատում է «ՍԱՍ գրուպ» ՍՊԸ-ում՝ որպես մենեջեր:
