Թուրքիան պատրաստ է Սիրիայի սահմանամերձ շրջաններում ահաբեկչական խմբերի դեմ նոր ռազմական գործողություններ իրականացնել: Այս մասին այսօր հայտարարել է Թուրքիայի նախագահ Ռեջեփ Թայիփ Էրդողանը, հաղորդում են թուրքական լրատվամիջոցները:
«Սիրիայի տարածքում՝ Եփրատ գետի արևմտյան մասում հակաահաբեկչական գործողությունները սահմանափակելու կոչերն անընդունելի են: Թուրքիայի համար կարևոր չէ, թե ահաբեկիչները որտեղից են գործում, մենք պատրաստ ենք ամեն ինչ անել, որպեսզի նրանց ոչնչացնենք»,- նշել է նա:
Էրդողանը նաև ասել է, որ սիրիական տարբեր քաղաքների բնակչությունը, այդ թվում՝ Մանբիջի, Թել Աբյադի, Ռաս-Էլ-Այնի, կողմ է Թուրքիայի մուտքին:
«Ոչ ոք իրավունք չունի հայտարարելու, որ Թուրքիան զավթում է Սիրիան», – ասել է նախագահը:
Հիշեցնենք, որ հունվարի 20-ին Թուրքիայի Զինված ուժերը Սիրիայի Ազատ բանակի հետ համատեղ սկսեցին «Ձիթենու ճյուղ» ռազմական գործողությունը՝ Սիրիայի Աֆրին քաղաքում:
