Հանրապետության փողոցում գտնվող «Զովք» սուպերմարկետում, հաշվիչ դրամարկղային կտրոն չեն տալիս: Մեր թղթակիցն այնտեղից պարբերաբար գնումներ է կատարոմ, բայց կտրոն միչտ չէ, որ տալիս են: Երբեմն տալիս են, երբեմն խփում են մեքենային, բայց կտրոնը չեն տալիս, երբեմն ընդհանրապես չեն էլ խփում: Երեկվա գնումների դեպքում, օրինակ, չեն տվել: Շրջանառվող տեղեկությունների համաձայն՝ «Զովք»-ը պատկանում է Պետեկամուտների կոմիտեի նախագահ Գագիկ Խաչատրյանին:
Ճիշտ է, խանութի տարբեր բաժիններում տեղադրված են այդ նոր հաշվիչ դրամարկղային մեքենաները, սակայն վաճառողները հազվադեպ են այն օգտագործում: Այդ խանութից հիմնականում օգտվում են շրջակայքի բնակիչները, որոնց վաճառողները ոչ միայն դեմքով, այլև անձնապես են ճանաչում: Եվ դրա համար էլ վստահ են, որ նրանք ոչ միայն կտրոն չեն պահանջի, այլ նաև չեն դժգոհի կամ բողոքի դրա համար, հատկապես որ ոչ միայն այդ խանութից առևտուր անող քաղաքացիները, այլև Երևանի ամբողջ բնակչությունը գիտի, որ «Զովքը» պատկանում է Գ.Խաչատրյանին, և կտրոն չտալու համար ՊԵԿ նախագահն ինքն իրեն չի տուգանի:
Հիշեցնենք նաև, որ տարիներ առաջ «Զովքը» համարվում էր համեմատաբար էժան խանութ: Այն ժամանակ Գ.Խաչատրյանը Մաքսային ծառայության պետի տեղակալն էր, հետո՝ արդեն պետը: Եվ այդ ժամանակ կարծիք կար, թե «Զովքում» վաճառվում են հիմնականում չմաքսազերծված, այսինքն՝ ներկրված, բայց մաքսայինում չգրանցված ապրանքներ, այդ պատճառով էլ այնտեղ համեմատաբար էժան գներ են: Իսկ ավելի ուշ Գ.Խաչատրյանը դարձավ հարկային և մաքսային միացյալ կառույցի՝ ՊԵԿ-ի նախագահը: Դժվար է ասել, թե հիմա նրա խանութի բոլոր ապրանքնե՞րն են մասազերծված, թե՞ ոչ, և նա ո՞ր չափով է հարկային դաշտում, բայց այդ խանութը տարածքում միակն է, ու անզեն աչքով էլ է երևում, որ այնտեղ առևտուրը եռում է:
Ընդհանրապես, Գ.Խաչատրյանը տարիներ ի վեր հայտնի է եղել նաև որպես խոշոր ներկրող և մյուս ներկրողների ու գործարարների գործունեությունը խոչընդոտող պաշտոնյա: Հիշեցնենք, որ դեռևս Մաքսայինի պետի տեղակալ եղած ժամանակ նրա կոռուպցիոն և խոչընդոտող գործունեության մասին բարձրաձայնել էին Խաչատուր Սուքիասյանը և «Ռոյալ Արմենիա» ընկերության հիմնադիրները, ովքեր հետո դատական խնդիրներ են ունեցել նրա հետ:
