Սերժ Սարգսյանին կից սահմանադրական փոփոխությունների հանձնաժողովից որևէ հարցի պատասխան ստանալու համար, պարզվում է, երկար օրերով սպասել է պետք:
«Հայկական ժամանակ» օրաթերթը գրում է, որ նախ, անհրաժեշտ է գրավոր հարցում ուղարկել արդարադատության նախարարի մամուլի խոսնակին, ով այդ հարցումը ուղարկում է Սահմանադրական դատարան, ՍԴ-ն էլ հարցումն ուղարկում է բարեփոխումների հանձնաժողով, որտեղից հարցումը հասնում է հանձնաժողովի քարտուղարություն:
Քարտուղարությունն էլ իր հերթին հարցի պատասխանը ճշտում է ՍԴ նախագահ Գագիկ Հարությունյանից: Ու քանի որ Գագիկ Հարությունյանին տեսնելն այդքան էլ հեշտ չէ, պետք է սպասել հարմար առիթի, ասենք, սահմանադրական փոփոխությունների հանձնաժողովի նիստի, որից առաջ էլ պետք է հարմարեցնել մի 2 րոպեով զրուցել ՍԴ նախագահի հետ: Այսպիսով, խախտվում է անգամ տեղեկատվության ազատության մասին օրենքը, որը պատասխանի համար սահմանում է հնգօրյա ժամկետ: Ահա նման ոլոր-մոլոր, երկար-բարակ ճանապարհ՝ հարցերի համար:
Հոդվածն ամբողջությամբ՝ կարդացեք «Հայկական ժամանակ» օրաթերթի այսօրվա համարում:
