Վերջին մեկ տարում տարածաշրջանում Թուրքիայի դիրքերը բավական խարխուլ հիմքերի վրա են, ինչն արդյունք է սիրիական ճգնաժամի: Այսօր տեղի ունեցած մամուլի ասուլիսի ժամանակ նման տեսակետ հայտնեց թուրքագետ Անդրանիկ Իսպիրյանը:
«Թուրքիայի մտահոգություններից մեկն այժմ 2015 թվականի՝ Հայոց ցեղասպանության 100-րդ տարելիցի մոտենալն է, մյուսը` տարածաշրջանում թուլացող նրա ազդեցությունը: Ինչ վերաբերում է ղարաբաղյան հարցում թուրքական հնարավոր ազդեցությանը, ապա կարող եմ ասել, որ 2008-ից այս առումով ոչինչ չի փոխվել՝ նույն սցենարն է, նույն խաղացողները»,- ասաց նա:
Անդրադառնալով օրերս կայացած Սարգսյան-Ալիև հանդիպմանը՝ թուրքագետը նկատեց, որ թուրքական մամուլում այն որակվեց ինչպես պատմական, այնպես էլ տարածաշրջանային խաղաղությանը միտված հանդիպում:
«Խոսելով հայ-թուրքական հարաբերությունների կարգավորման գործընթացի մասին՝ պետք է նշել, որ այն մեկնարկի օրից իսկ ձախողված է: Պատճառն այն է, որ հարցը կապվում է ղարաբաղյան խնդրի հետ: Մինչդեռ Հայաստան-Թուրքիա հարաբերությունները չպետք է պայմանավորել երրորդ հարցով: Միաժամանակ չեմ բացառում, որ Ցեղասպանության 100-րդ տարելիցի նախօրեին հայ-թուրքական սահմանը բացվի, սակայն հաջորդ օրն իսկ փակվի:
Թուրքիայի ԱԳ նախարար Դավութօղլուի՝ ԱՄՆ-ում օրերս արած հայտարարություններից տպավորություն է ստեղծվում, թե նա օրուգիշեր չի քնում և մտածում է միայն Հայաստանի հետ հարաբերությունների կարգավորման մասին: Բայց ինչ էլ լինի, իմ կարծիքով՝ հայ-թուրքական հարաբերությունների կարգավորման գործընթացում Հայաստանը մինչ այժմ ոչինչ չի շահել»,- ասաց Անդրանիկ Իսպիրյանը՝ հավելելով, որ Թուրքիայի՝ «Զրո խնդիր հարևանների հետ» քաղաքականության գոնե առաջին փուլը կարելի է համարել տապալված:
Թուրքագետի խոսքով՝ առաջիկայում կայանալիք Պուտին-Էրդողան հանդիպումը էական նշանակություն չի ունենա, սակայն դրա արդյունքում կորոշվի Թուրքիայի ԱԳ նախարար Ահմեդ Դավութօղլուի՝ Հայաստան կատարելիք այցի ձևաչափը:
«Ինչ էլ լինի՝ Ռուսաստանը Թուրքիային թույլ չի տա տարածաշրջանում խաղալ ավելին, քան ինքն ուզում է: Թուրքիան, իհարկե, ցանկանում է ազդեցություն ունենալ Կովկասում, և այդ է պատճառը, որ Պուտին-Էրդողան հանդիպմանը թուրքական կողմը կբարձրացնի նաև ղարաբաղյան հարցը: Թուրքիան հիմա էլ ուզում է մտածել, որ մեկ հանդիպմամբ կարող է լուծել ղարաբաղյան հիմնախնդիրը, սակայն դա պարզապես անհնար է»,- ամփոփեց Անդրանիկ Իսպիրյանը:
