Այսօր Ուկրաինայի խորհրդարանը նախատեսում է քննարկել արտասահմանում բանտարկյալներին բուժելու մասին օրինագիծը: Եթե նախագիծն ընդունվի և ստորագրվի Վիկտոր Յանուկովիչի կողմից, նախկին վարչապետ Յուլյա Տիմոշենկոն կարող է հեռանալ երկրից, ինչը Կիևին հնարավորություն կտա ստորագրել Ասոցացման և ազատ առևտրի գոտու ստեղծման մասին համաձայնագիրը Եվրամիության հետ նոյեմբերի 28-29-ը Վիլնյուսում տեղի ունենալիք «Արևելյան գործընկերության» գագաթնաժողովին: Համաձայնագիրը նախաստորագրվել է անցած տարի: Բացի Ուկրաինայից՝ գագաթնաժողովի արդյունքներին են սպասում նախագծի մյուս մասնակիցները: «Արևելյան գործընկերությունում» ընդհանուր առմամբ ներառված է վեց երկիր՝ Հայաստան, Վրաստան, Ադրբեջան, Բելառուս, Մոլդովա, Ուկրաինա՝ գրում է «Վեդոմոստին»:
Մոլդովան և Եվրամիությունը մտադիր են նախաստորագրել Ասոցացման և ազատ առևտրի գոտու մասին համաձայնագիրը, իսկ միջոցառման ավարտից հետո Եվրահանձնաժողովը պատրաստվում է առաջարկել չեղյալ հայտարարել այցագրի ռեժիմը ԵՄ-ի և Մոլդովայի միջև: Այս մասին անցած շաբաթ հայտարարել է Եվրահանձնաժողովի նախագահ Ժոզե Մանուել Բարոզուն:
Երկիրը համապատասխանում է պահանջներին, որոնք անհրաժեշտ են այցագրային ռեժիմի լիբերալացման համար: Մոլդովայի եվրոպական ուղին իրական է դառնում, ասել է Բառոզուն երկրի վարչապետ Հուրի Լյանկեի հետ բանակցություններից հետո:
Երեկ Լյանկեն հայտարարել է, որ համաձայնագրի վավերացումից հետո մտադիր է խորհրդակցություններ վարել Ռուսաստանի հետ: ԵՄ-ի այցագրի երկխոսության մասին զեկույցում նշվում է, որ Ուկրաինան և Վրաստանը դրական քայլեր կատարում են, սակայն աշխատանքը պետք է շարունակել:
Վրաստանը ևս պատրաստվում է նախաստորագրել Ասոցացման և ազատ առևտրի գոտու մասին համաձայնագիրը: Վիլնյուսյան գագաթնաժողովը պատմական է Վրաստանի համար»,- նոյեմբերի սկզբին հայտարարել է երկրի նորընտիր նախագահ Գեորգի Մարգվելաշվիլին: Նա հույս ունի, որ իր երկիրը և Եվրամիությունը համաձայնագիրը կստորագրեն 2014թ. աշնանը:
Վիլնյուսում համանման համաձայնագրեր կարող էր նախաստորագրել նաև Հայաստանը, սակայն սեպտեմբերին Հայաստանի նախագահ Սերժ Սարգսյանը Մոսկվայում այցի ժամանակ հայտարարել է, որ իր երկիրը պատրաստվում է ինտեգրվել Մաքսային միությանը: Նախագահի այս որոշումից հետո եվրոպացի դիվանագետները հաղորդել են, որ գագաթնաժողովին կարող է ստարագրվել ապագա համագործակցության և փոխըմբռնման հուշագիր:
Գագաթնաժողովում ամենաքիչ հաջողությունների կարող են հասնել Բելառուսը և Ադրբեջանը: Մինսկը ներկայացված կլինի ոչ բարձրագույն մակարդակով. նախագահ Ալեքսանդր Լուկաշենկոյի մուտքը ԵՄ փակ է: Երկրի պատվիրակությունը, սակայն, կմեկնի Վիլնյուս: Գագաթնաժողովից հետո կարող են սկսվել բանակցություններ Բելառուսի քաղաքացիների համար այցագրային ռեժիմի թեթևացման ուղիների մասին: Ադրբեջանին կառաջարկվեն արդեն սկսված նախագծեր:
Տարեսկզբից Ռուսաստանի նախագահ Վլադիմիր Պուտինը և վարչապետ Դմիտրի Մեդվեդևը մշտապես նախազգուշացնում են Ուկրաինային ԵՄ-ի հետ համաձայնագիր կնքելու դեպքում տնտեսությանն ուղղված վնասների մասին: Ուկրաինական ապրանքները խիստ մաքսային ստուգման են ենթարկվում: Ռուսական իշխանությունների մեծ ուշադրությունը Ուկրաինայի հանդեպ պայմանավորված է ինչպես երկրի մեծությամբ, այնպես էլ նրանով, որ Ուկրաինան մտադիր է ստորագրել համաձայնագիրը, այլ ոչ թե նախաստորագրել այն, ինչպես Վրաստանը և Մոլդովան, մեկնաբանում է «Ռուսաստանը գլոբալ քաղաքականության մեջ» թերթի գլխավոր խմբագիր Ֆյոդոր Լուկյանովը: Եթե մյուս երկրները ևս պատրաստվեն ստորագրել համաձայնագիրը, ապա չպետք է բացառել ճնշումները ռուսական կողմից՝ նախազգուշացնում է Լուկյանովը: Վրաստանի դեմ ճնշման լծակներն այնքան շատ չեն, իսկ Քիշնևի հանդեպ կարող են կիրառվել հականերգաղթային միջոցներ: Նախորդ տարի մոլդովական գինու ռուսական շուկա մատակարարման վրա դրված արգելքը չպետք է դիտարկել որպես պատժամիջոց, դա արդեն սովորական երևույթ է:
«Ասոցացման մասին համաձայնագրի նախաստորագրումը կամ ստորագրումը չի նշանակում ո՛չ ԵՄ ընտանիքի անդամ դառնալ, ո՛չ համապատասխան բանակցությունների սկսում. դրան պատրաստ չեն ո՛չ «Արևելյան գործընկերության» երկրները, ո՛չ ԵՄ-ը»,- ասել է Ռուսաստանում ԵՄ ներկայացուցչության մամլո քարտուղար Սորեն Լիբորիուսը:
