Կկայանա՞ արդյոք դեկտեմբերի 1-ին «Սիրո մեղեդի» համերգը հայտնի սկանդալից հետո, դեռ պարզ չէ, թեև «Համազգային վստահություն» խորհրդի նախագահ Աստղիկ Խաչատրյանն այսօր ասել է, որ այն կայանալու է, բայց հավանաբար ոչ նույն կազմով: Նա այդպես էլ չնշեց, թե թե ովքեր են երգելու այդ համերգին, միայն ասաց, որ տոմսերը հետ տալու խնդիր չկա, քանի որ տոմսերը գնվում են այն կազմակերևպությունների կողմից, որոնք խորհրդի հետ համագործակցում են, նաև ՀՀԿ-ի կողմից:
Նա նախ խոսեց իրենց Համազգային վստահություն խորհրդի գործունեությունից: Խորհրդի նպատակն աստղերի ինստիտուտի ձևավորումն է, նրա խոսքով՝ ժողովուրդն է որոշում արժանիներին: Ի սկզբանե այն զբաղվել է տնտեսության ոլորտների ուսումնասիրությամբ:
Անդրադառնալով Քրիստինե Պեպելյանի՝ համերգին մասնակցելուն հրաժարվելուց, նա ասաց. «Ի սկզբանե ես ապշած եմ համացանցում տեսնելով Քրիստինե Պեպելյանի հայտարարությունները, լուրերը: Սա լուրջ բան չի պարունակել, բազմիցս համագործակցել ենք նրա հետ, ցավալին այն է, որ երբեք ոչ մի դեպքում ոչ մի երգչի հետ որևէ գումար չի շահարկվել նախկինում: Համազգային խորհուրդը միջանկյալ փոքրիկ բարեգործություն է կազմակերպում: Բարեգործության սկզբունքը դրա մասին չբարձրաձայնելն է, որ մենք ի լուր աշխարհի հայտարարենք, իմաստ չեմ տեսնում որևէ երգչի ասելու»,- ասաց նա՝ հավելելով, որ նախկին որևէ գումարային խոսակցություն չի եղել: Նա նաև նշեց, որ որևէ կերպ չի ցանկացել անվանարկել որևէ երգչի. սա համազգային վստահության ակցիա է, որին մասնակցում է մի քանի կազմակերպություն:
«Հեռախոսազրույցում, երբ ես իրեն բացատրեցի, ասացի՝ ոչինչ, եթե այս անգամ հարմար չէ, ուրիշ անգամ մենք գուցե կհամագործակցենք: Մնացածն ամբողջը սարքովի է, ոչ մի ուրիշ իմաստ չեմ տեսնում: Ոչ մի պայմանավորվածություն գրավոր, ոչ մի իրավաբանական փաստաթուղթ չի կնքվել: Սա մեր առօրյան է, մենք աշխատում ենք այս կերպ: Այստեղ ոչ մի սկանդալ չեմ տեսնում»,- ասաց նա՝ հավելելով. «Մեր սկզբունքը հետևյալն է. Համազգային բարեգործություն խորհուրդը կազմակերպում է բարեգործական համերգ՝ իր անունից, ո՛չ երգիչների անունից: Սա մեր բարեգործությունն է»:
Նա ասաց, որ իրենց համար սա նորմալ երևույթ է: Մինչև իրավաբանական ուժ ստանալը, նման խնդիրների հանդիպելը, հիմնականում կնքում ենք պայմանագրեր: «Չեմ կարծում, որ շատ մեծ պրոբլեմ է, որ ինքը չի երգելու»,- ասաց նա՝ նշելով, որ սա պրոֆեսիոնալ մակարդակի համար լրիվ նորմալ է:
Լրագրողները հետարքրքվեցին՝ այս խորհուրդը, որը «Տարվա լավագույն ապրանքանիշ» մրցանակաբաշխություն է կազմակերպում, ի՞նչ սկզբունքներ է հաշվի առնում լավագույններին ճանաչելիս: Աստղիկ Խաչատրյանը նշեց, որ սոցհարցումներ են անում, թե որ ընկերությունն է արժանացել համազգային վստահության: «Մեր կազմակերպությունը հասարակական խորհուրդ է, որը հիմնվում է ժողովրդի քվեարկության վրա: Աշխարհի բոլոր քաղաքակիրթ երկրներում ընդունված է մրցակցային դաշտ ստեղծել»,- ասաց նա:
Անդրադառնալով դեկտեմբերի 1-ի համերգին՝ նա նշեց. «Համերգը կկայանա, բոլորիդ կհրավիրենք: Մշտապես շատ գեղեցիկ համերգներ ենք կազմակերպում, ամեն ինչի վրա ուշադրություն ենք դարձնում: Բարի կամքի դրսևորում ցուցաբերող աստղերն արդեն կերգեն անվճար»,-ասաց «Համազգային վստահություն» խորհրդի նախագահ Աստղիկ Խաչատրյանը:
Մեր այն հարցին, խորհրդի նախագահն արդյոք որևէ կերպ իրեն մեղավոր չի՞ համարում, նա պատասխանեց, որ ինքը մեղավորության տարր չի տեսնում. « Ոչ մեկը չի տուժել, հաջորդ անգամ ևս, երբ միջոցառումներ կունենանք, կհրավիրենք իրեն, եթե կհամաձայնի՝ սիրով»:
Այսուհետ ավելի նուրբ և զգույշ չե՞ն աշխատի երգիչների հետ: Այս հարցին ի պատասխան՝ Ա.Խաչատրյանն ասաց, որ իրենք կետ առ կետ շատ զգույշ աշխատում են, «Համազգային վստահությունը» ցանկանում է հանդուրժել և սիրել իրար. այսօրվա ներկան վաղվա ապագան է կառուցում:
