Hetq.am-ը այսօր տեղեկություն էր հրապարակել, թե ՀՀ ոստիկանության քննչական խումբը սեպտեմբերին մեկնել էր Կիպրոս, որտեղ Կիպրոսի դատախազության հետ համատեղ քննչական գործողություններ է իրականացրել՝ պարզելու վարչապետ Տիգրան Սարգսյանի և Արարատյան թեմի առաջնորդ Նավասարդ Կճոյանի առնչությունը Կիպրոսում գրանցված օֆշորային երկու ընկերություններին:
«Առաջին լրատվական»-ի հետ զրույցում Ոստիկանության լրատվության և հասարակայնության հետ կապերի վարչության պետ Աշոտ Ահարոնյանը՝ անդրադառնալով այդ հրապարակմանը, ասաց. «Կիպրոսի Հանրապետություն ուղարկված իրավական օգնություն ցուցաբերելու մասին միջնորդության կատարման արդյունքում ստացված՝ Կիպրոսի Հանրապետությունում գրանցված WLISPERA HOLDINGS LIMITED ընկերության բաժնեմասերի փոխանցման վերաբերյալ փաստաթղթերի պատճեններում առկա ստորագրությունները Տիգրան Սարգսյանի, Սամվել Կճոյանի, Աշոտ Սուքիասյանի կամ այլ անձանց կողմից կատարված փաստը ստուգելու նպատակով նոյեմբերի 11-ին նշանակվել է դատաձեռագրաբանական փորձաքննություն, որի կատարումը հանձնարարվել է «Փորձաքննությունների ազգային բյուրո» փորձագետներին»:
