Խարդախ Բեռնար Մեդոֆի մոտ 10 հազար զոհերը, որոնց մերժել էին վերադաձնել միջոցները, կարող են որոշակի փոխհատուցում ստանալ բազմամիլիարդանոց վնասների դիմաց: Այս մասին հայտնում է The New York Times-ը:
Մեդոֆը, ով նախկինում Ուոլ Սթրիթում եղել է հարգանք վայելող ներդրող, 2009-ին խոստովանել է, որ հեջ հիմնադրամի տեսքով կազմակերպել է ֆինանսական բուրգ: Ներդրողները 17 միլիարդ դոլար ներդրված միջոց էին կորցրել, իսկ նոմինալ կորուստները՝ չստացված շահույթի հաշվով, կազմել են 65 միլիարդ դոլար: Մեդոֆը 150 տարվա ազատազրկման պատիժ է կրում՝ առանց վաղաժամկետ ազատ արձակման իրավունքի:
Սնանկության հարցերով զբաղվող դաշնային դատարանը կարողացել էր հավաքել Մեդոֆին պատկանող 9 միլիարդ դոլարի ակտիվներ, սակայն տուժածների ճնշող մեծամասնությունը եղել են, այսպես կոչված, անուղղակի ներդրողներ, այդ իսկ պատճառով միջոցների վերադարձման հայցերը մերժվել են: Սակայն արդարադատության նախարարությունը 2.35 միլիարդ դոլար է հավաքել, այսպես կոչված, Մեդոֆի զոհերի հիմնադրամում:
