Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում Լևոն Ավետիսյանի նախագահությամբ ավարտվել է Սարիբեկ Հարությունյանի գործի դատավարությունը:
34-ամյա Սարիբեկ Հարությունյանը 2012 թվականի ապրիլի 17-ի երեկոյան գնացել է ԲՀԿ-ի՝ Արաբկիրի 19 փողոցում գտնվող շտաբ՝ ժամանակ անցկացնելու:
Այդ շտաբում է եղել նաև Ժորա Կարապետյանը:
Սարիբեկը, Ժորան ու ևս երկու երիտասարդ թղթախաղով են զբաղվել, մի քանի հոգի հեռուստացույցով ֆուտբոլ են դիտել:
Ըստ վկաների՝ թուղթ խաղացողներից՝ Սարիբեկը խաղաթղթերը դասավորելու հետ կապված՝ վիճաբանել է Ժորայի հետ: Սկսել են գոռգոռալ: Բոլորը շտաբից դուրս են եկել:
Ժորան ու Սարիբեկն առանձնացել են ու խոսելով քայլել դեպի մոտակա խանութը:
Դատարանը հաստատված է գնահատել, որ խանութի մոտ Սարիբեկի ու Ժորայի վիճաբանությունը վերածվել է կռվի: Սարիբեկը բռունցքով հարվածել է Ժորայի գլխին ու դեմքի շրջանին:
Ժորա Կարապետյանը վայր է ընկել:
Կռվի պահը նկարագրած ականատես վկայի, ներկայումս հանգուցյալ Զ. Մելքոնյանի նախաքննական ցուցմունքով՝ երբ Սարիբեկը բռունցքով ուժգին հարված է հասցրել Ժորայի գլխի ձախ կողմին՝ ականջի մոտ, Ժորա Կարապետյանը «կարծես նոկաուտի ենթարկվածի պես մի քանի քայլ հետ գնալով՝ փայտի պես մեջքի վրա ընկել է գետնին»:
Ժորային տարել են մոտակա տուն, ուշքի են բերել: Հետո նա ընկերների հետ դուրս է եկել այդ տնից:
Ընկերների ասելով՝ Ժորային տարել են Միքայելյանի անվան վիրաբուժության ինստիտուտ, բայց Ժորան հրաժարվել է իջնել մեքենայից: Պահանջել է իրեն տուն տանել: Տարել են:
Բայց տուժողի վիճակը գնալով վատացել է: Նրան տեղափոխել են նույն՝ վիրաբուժության ինստիտուտը: Վիրահատել են գլուխը: Մի քանի օր Ժորա Կարապետյանը գիտակցության չի եկել ու մահացել է:
Դատաբժշկական փորձաքննության եզրակացության համաձայն՝ Ժորա Կարապետյանի մահը վրա է հասել գլխուղեղի կարևորագույն կենսական ֆունկցիաների խանգարումից՝ գանգուղեղային փակ, բութ վնասվածքներ ստանալու հետևանքով:
Դատաբժշկական կրկնակի փորձաքննության եզրակացությամբ՝ տուժողի մահվան հետ անմիջական կապ ունեն բերանի ու ձախ քունքային շրջանում ներդրված ուժերը:
Փորձագետի ցուցմունքով՝ չի բացառվում, որ մահացու վնասվածքները պատճառվեին բռունցքի հարվածով:
Սարիբեկ Հարությունյանը նախաքննության և դատաքննության ընթացքում հրաժարվել է ցուցմունքներ տալուց:
Ընդհանուր իրավասության դատարանն արձանագրել է նաև, որ Սարիբեկ Հարությունյանին 2012 թվականի ապրիլի 19-ին ոստիկանության բաժնում ապօրինի պահել են անազատության մեջ: Զրկել են իրավաբանական օգնություն ստանալու իրավունքից: Ապա խոչընդոտել են փաստաբանի աշխատանքին: Վկաների միջև առերեսում է կատարվել առանց նրանց ցուցմունքներում հակասություններ լինելու: Բայց առերես հարցաքննություն չի կատարվել մեղադրյալի դեմ ցուցմունք տված անձի հետ: Քրեական գործի նյութերի զգալի մասը գրված է անընթեռնելի կամ դժվար ընթեռնելի ձեռագրով:
Այս ամենն ի մի բերելով՝ դատարանն արձանագրել է, որ Սարիբեկ Հարությունյանի վերաբերյալ քրեական գործի մինչդատական վարույթի ընթացքում իրականացված մի շարք գործողություններ կատարվել են քրեադատավարական օրենքի խախտմամբ:
Սակայն, ըստ դատարանի, այդ խախտումներն այնքան էական չեն եղել, որ ձեռք բերված ապացույցներն անթույլատրելի ճանաչվեն:
Դատարանը հարկ է համարել նախաքննական խախտումներն ու բացթողումները «վերացնելու, հետագայում համանման դեպքերի տեղիք չտալու նպատակով կայացնել լրացուցիչ որոշում և ուղարկել համապատասխան պաշտոնատար անձանց քննարկմանը»:
Ընդհանուր իրավասության դատարանը Սարիբեկ Հարությունյանին մեղավոր է ճանաչել ՀՀ քրեական օրենսգրքի 112 հոդվածի 2-րդ մասի 14-րդ կետով՝ դիտավորությամբ տուժողի առողջությանը ծանր վնաս հասցնելու համար, որի հետևանքով տուժողը մահացել է:
Դատարանը հաշվի է առել, որ Սարիբեկ Հարությունյանի խնամքին երկու անչափահաս երեխա կա՝ 8 և 7 տարեկան:
Սարիբեկ Հարությունյանը դատապարտվել է 7 տարի ազատազրկման:
Պատժի սկիզբը՝ 2012 թվականի ապրիլի 27-ից:
