Գենետիկները ռեկորդային մեծությամբ տոհմածառ են «աճեցրել», որը միավորում է ժամանակակից Եվրոպայի, Ամերիկայի, Ավստրալիայի և Հարավային Աֆրիկայի մոտավորապես 13 միլիոն բնակիչների:
Գենետիկները կազմել են աշխարհի ամենամեծ տոհմածառը՝ 11 սերունդների 13 միլիոն բնակիչներից, ովքեր ապրել են 1650-2000 թվականներին: Դրա համար գիտնականներն օգտագործել են հանրային տվյալներ։ Այս մասին հայտնում է Science ամսագիրը։
Ամերիկացի և իսրայելցի գիտնականների մի խումբ, որը գլխավորում է Ջոան Կապլանիսը՝ Նյու Յորքի գենոմային կենտրոնից, տվյալներ է հավաքել Geni.com կայքի օգտատերերի վերաբերյալ: Ընդհանուր առմամբ ընտրվել է 86 միլիոն պրոֆիլ:
Հետազոտողները վերլուծել են ուսումնասիրության մասնակիցների միջև եղած կապը, ինչպես նաև աշխարհագրական առումով միմյանց մոտ լինելը:
Արդյունքում Կապլանիսի թիմը 53 միլիոն անհատական տոհմածառեր է ստացել, որոնք միավորում էին օգտատերերին:
Դրանցից ամենամեծը բաղկացած է 13 միլիոն մարդկանցից և ներառում է 11 սերունդ: Դրանք հիմնականում եվրոպացիներ և նրանց հետնորդներ են, ովքեր տեղափոխվել էին Հյուսիսային Ամերիկա:
Վերլուծելով ստացված տվյալները՝ գիտնականները նկատել են կյանքի տևողության օրինաչափ նվազում՝ կապված մարտական կոնֆլիկտների, մասնավորապես՝ Առաջին և Երկրորդ համաշխարհային պատերազմների, ինչպես նաև Ամերիկայի Քաղաքացիական պատերազմի հետ:
Քարտեզի վրա երեխաների ծննդավայրերը նշելով՝ գիտնականները բացահայտել են մարդկանց վերաբնակեցման պատմության առավել նշանակալի իրադարձությունները, օրինակ՝ 1620թ. առաջին գաղթականների ժամանումը ներկայիս Մասսաչուսեթս նահանգի տարածք Մեյֆլայեր նավով և 1788թ. Ավստրալիայում բրիտանական գաղութի հիմնումը:
Բացի այդ, պարզվում է, որ կանայք ավելի հաճախ են գաղթում, քան տղամարդիկ, սակայն առավել կարճ հեռավորության վրա:
Նախքան արդյունաբերական հեղափոխությունը (1750թ.)՝ ամուսնությունների մեծամասնությունը տեղի էր ունենում միմյանցից ոչ ավել, քան 10 կիլոմետր հեռավորության վրա բնակվող մարդկանց միջև: Ժամանակի ընթացքում իրավիճակը փոխվեց, և արդեն 1950-ական թթ. ապագա ամուսինների բնակավայրերի միջև միջին հեռավորությունը հասավ 100 կիլոմետրի:
Ավելի վաղ պատերազմող ազգերի գենետիկ կապի մասին տեսանյութը ցնցել էր համացանցը:
