Այս տարին ռեկորդային կլինի ԱՄՆ քաղաքացիությունից հրաժարված ամերիկացիների թվով: Ինչպես հաղորդում է Fortune պարբերականը, 2013թ. պաշտոնական տվյալներով՝ ավելի քան 2000 մարդ հանձնել են իրենց անձնագրերը, ինչը 33%-ով ավելի շատ է 2011թ. համեմատ:
Պարբերականի փոխանցմամբ՝ ամերիկացիները երկրից փախչում են հարկերի պատճառով: ԱՄՆ-ը և Էրիթրեան աշխարհի միակ երկրներն են, որոնք հարկում են իրենց քաղաքացիների արտասահմանյան եկամուտները: Անկախ նրանից, թե որտեղ է բնակվում և աշխատում ԱՄՆ քաղաքացին, նա պարտավոր է իր եկամուտների մասին հաշվետվություն ներկայացնել ամերիկյան գանձարան: Այսպիսով, անձնագրերից հրաժարվելը ամերիկացիներին թույլ է տալիս շատ գումար տնտեսել:
ԱՄՆ քաղաքացիությունից հրաժարվելը հաճախադեպ է դարձել նաև օֆշորներին Ֆինանսների նախարարության հայտարարած պատերազմի պատճառով: Բացի այդ, ֆինանսական գերատեսչությունը կանոններ է սահմանել, որոնց համաձայն արտասահմանյան բանկերը պետք է ուսումնասիրեն ամերիկացիների հաշիվները (որոնցում գտնվում է 50 հազար դոլար և ավելի) և այդ մասին հաղորդեն ԱՄՆ հարկային տեսչությանը:
Նշվում է, որ հայտնի երգչուհի Թինա Թյորները ևս հրաժարվել է ԱՄՆ քաղաքացիությունից: Հոկտեմբերի վերջին 74-ամյա երգչուհին Բեռնում այցելել է ամերիկյան դեսպանատուն, որպեսզի ինքնակամ հրաժարվի ԱՄՆ քաղաքացիությունից և ընդունի շվեյցարական քաղաքացիություն:
