Փետրվարի 21-ին Բիլ Գեյթսն առաջին անգամ ցերեկային զվարճալի հեռուստաշոուի մասնակիցն է դարձել։ Նա հյուր է եկել հայտնի հաղորդավար Էլեն դե Ջեներեսին։ 62-ամյա միլիարդատերը միշտ աչքի է ընկել իր սուր հումորի զգացումով։ Հաղորդումը սկսվել է կարճ հարցազրույցով։ Գեյթսը խոստովանել է, որ սկսել է բիզնեսով զբաղվել ոչ այն պատճառով, որ ցանկացել է հարստանալ։ «Ամենից շատ ես ծրագրային ապահովումն էի սիրում։ Եվ դա էր հիմնական պատճառը, որ բացեի իմ սեփական ֆիրման, որը կզբաղվեր դրա մշակմամբ»,– պատմել է Գեյթսը։
Microsoft-ը ֆոնդային շուկա է դուրս եկել, երբ Բիլը 30 տարեկան է եղել։ «Ես ցնցված էի, գիտակցելով, թե որքան արժեքավոր է իմ գործը։ Ես փող ունեցա և կարող էի թանկ գնումներ կատարել»,– ասել է միլիարդատերը։
Իսկ հետո ժպիտով ավելացրել է. «Բայց իմ ճաշակը չի փոխվել, այնպես որ ինչ–որ էքստրավագանտ իրեր ես այդպես էլ չունեցա։ Իհարկե, Porsche գնեցի, և ինքնաթիռ գնեցի, որ ճամփորդելը հեշտ լինի»։ «Մի՞թե մեքենան և ինքնաթիռը ձեր միակ էքստրավագանտ գնումներն են»,– չհավատալով հարցրել է Էլենը։ Գեյթսը հանձնվել է. «Դե եթե խոսենք իսկապես ցնորամիտ իրերի մասին… Մեր տանը մի ամբողջ սենյակ կա բատուտով։ Երեխաներն այն պաշտում են։ Հիշեք՝ բատուտով սենյակ։ Խորհուրդ եմ տալիս»,– ասել է Գեյթսը։
