ԱՄՆ-ը կարծում է, որ «Ժնև 2» միջազգային համաժողովի նախապատրաստությունների քննարկման համար սիրիական կառավարական պատվիրակության այցը Մոսկվա դրական քայլ կլինի: Նման կարծիք է հայտնել Պետդեպի պաշտոնական ներկայացուցիչ Ջեն Պսակին՝ լրագրողների խնդրանքով մեկնաբանելով նոյեմբերի 18-ին Սիրիայի փոխարտգործնախարար Ֆեյսալ Մեկդադի և Ասադի քաղաքական հարցերով խորհրդական Բուսեյն Շաաբանի՝ Մոսկվա հնարավոր այցի մասին տեղեկությունը: Այս մասին հայտնում է ITAR-TASS-ը:
Նա նշել է, որ ԱՄՆ-ը, ինչպես և Ռուսաստանը, հակված են մնում Ժնևում համաժողովի կազմակերպմանը: Պսակին հավելել է, որ այդ նպատակով ձեռնարկվում են տարբեր քայլեր:
«Ռուսաստանն աշխատում է ռեժիմի հետ, իսկ մենք աշխատում ենք ընդդիմության հետ՝ հանուն ընդհանուր նպատակի, այն է՝ սիրիական խնդրի քաղաքական կարգավորումը»,- ասել է Պետդեպի ներկայացուցիչը:
Նա նաև հաստատել է, որ սիրիական ընդդիմության պատվիրակության կազմը, որը կուղևորվի Շվեյցարիա, դեռևս որոշված չէ:
Կհաջողվի՞ դա անել մինչև նոյեմբերի 25-ը, երբ Ժնևում կայանան ԱՄՆ-ի ու Ռուսաստանի փոխարտգործնախարարների, ինչպես նաև Սիրիայի հարցով ՄԱԿ-ի և ԱՊԼ-ի հատուկ պատվիրակ Լախդար Բրահիմիի նախնական հանդիպումը՝ դեռևս հայտնի չէ:
Նա նաև հայտարարել է, որ ԱՄՆ-ը, ինչպես նախկինում, հույս ունի համաժողովն անցկացնել մինչև տարեվերջ:
