Ֆրանսիացիների վստահության մակարդակը երկրի նախագահ Ֆրանսուա Օլանդի հանդեպ մեկ շաբաթվա ընթացքում նվազել է միանգամից վեց կետով: Ինչպես հաղորդում է ITAR-TASS-ը` վկայակոչելով YouGov հետազոտական կենտրոնի անցկացրած հարցումը, ֆրանսիացիների միայն 3 %-ն է հայտարարել, որ «շատ գոհ» է գործող նախագահի աշխատանքից, որն ընտրվել է 2012 թ. գարնանը: Հարցում անցկացնելու պրակտիկայի պատմության մեջ առաջին անգամ նախագահի վարկանիշի 15 % ցուցանիշ է գրանցվել:
Հարցման մասնակիցների 12 %-ն ուղղակի «գոհ է» պետության ղեկավարի վարած քաղաքականությունից, ինչը 6 %-ով քիչ է՝ նախորդ ամսվա համեմատ:
Ընդ որում, հարցվածների 49 %-ը «ծայրահեղ դժգոհ է» երկրի ղեկավարությունից, ինչը 7 %-ով ավելի շատ է հոկտեմբերի ցուցանիշների համեմատ:
Իսկ Ֆրանսիայի վարչապետ Ժան Մարկ Էյրոյի վարկանիշը նվազել է 4 կետով, և այժմ կառավարության ղեկավարին աջակցում է քաղաքացիների միայն 15 %-ը: Ընդհանուր առմամբ ֆրանսիացի բոլոր նախարարները սկսել են կորցնել երկրի քաղաքացիների վստահությունը:
Հարցման մասնակիցների մեծ մասի դժգոհության պատճառը գործազրկությունն է: Ներկայում Ֆրանսիայում գործազուրկ է տնտեսապես ակտիվ բնակչության 10.9 %-ը (շուրջ 3.29 միլիոն մարդ), ինչը բացարձակ ռեկորդ է երկրի համար:
