Ազգային ժողովը նոյեմբերի 14-ի արտահերթ նիստում որոշեց 2014-ի պետբյուջեի նախագծի քվեարկությունը հետաձգել չորս օրով: Վարչապետ Տիգրան Սարգսյանն ամփոփիչ ելույթում նշեց, որ կառավարության առաջնային մարտահրավերները գործազրկությունը, արտագաղթը, աղքատությունն ու կոռուպցիայի բարձր մակարդակն են: Դրանք, ըստ վարչապետի, կարևոր մարտահրավերներ ու լրջագույն խնդիրներ են, որոնք խոչընդոտում են մեր երկրի բնականոն զարգացմանը:
«Այն, որ մեր կառավարությունն արձանագրում է, որ այս խնդիրներն առկա են, մեր ընդդիմախոսների համար դժվարություններ է ստեղծում. նրանք փորձում են բացահայտել այլ լրջագույն խնդիրներ ու անհիմն փաստարկներ բերել, որը չի նպաստում երկխոսությանը: Պատրաստ ենք մասնագիտական քննարկումների ու ցանկացած հարցի տալ պատասխան»,- ասաց նա:
Վարչապետը նշեց, որ անհիմն մեղադրանքները ոչ մի լավ բանի չեն հանգեցնելու, ինչպես չեն հանգեցրել վերջին քսաներեք տարիների ընթացքում: Նրա խոսքով՝ հաջողության են հասնում նրանք, ովքեր հանդես են գալիս առաջարկություններով, ու դա գնահատվում է և՛ ժողովրդի, և՛ իշխանությունների կողմից:
«Մեր ընդդիմախոսները բարձրաձայնում են այն խնդիրները, որ կան Հայաստանում, և կառավարության խնդիրն է լուծում տալ, որպեսզի մեր քաղաքացիները շոշափելի արդյունքներ տեսնեն, այդ առումով մենք համաձայն ենք գնահատականների հետ: Մեր ընդդիմախոսներն իրենք են հայտարարում, որ քաղաքացիական հասարակության ձևավորման առումով կան հաջողություններ, որ այսուհետ ցանկացած իշխանություն կաշկանդված է լինելու, քանի որ ձևավորվում է քաղաքացիական հասարակություն, քանի որ առանց միջին խավի հնարավոր չէ բացահայտել մեր երկրի տնտեսական պոտենցիալը»,- ասաց նա՝ միաժամանակ առաջարկելով ՓՄՁ-ների հետ կապված քննարկում կազմակերպել:
