Բրիտանական գահի ժառանգորդ Ուելսի արքայազն Չարլզն այսօր նշում է ծննդյան 65-ամյակը: Նա պաշտոնապես հասել է թոշակի տարիքի՝ չնայած դեռ ոչ մի օր չի անցկացրել գահին, ինչը նա դիտարկում է որպես իր ապագա հիմնական աշխատանք: Այս մասին հայտնում է ITAR-TASS-ը:
Կյանքը դաժան է գտնվել Էլիզաբեթ II թագուհու և Էդինբուրգի դուքս Ֆիլիպի առաջնեկի նկատմամբ. ընտանեկան դրաման և ծանր ապահարզանն առաջին կնոջից՝ արքայադուստր Դիանայից, կարող էին կասկածի տակ դնել Չարլզի ապագան՝ որպես միապետի: Ընտանեկան տարաձայնությունների գագաթնակետին Դիանան հայտարարել էր, որ իր կյանքի նպատակը Չարլզին թագից զրկելն ու գահը Էլիզաբեթ II-ից իր ավագ որդուն՝ Ուիլյամին փոխանցելն է:
1997-ին՝ Դիանայի մահից հետո, Չարլզը կարողացել է վերականգնել իր հեղինակությունը: Հիմնականում դրան նպաստեց երկրորդ ամուսնությունը Կամիլլայի հետ:
Ամուսնությունից հետո վերջինս ստացել է Քորնուոլի դքսուհու տիտղոս: Այժմ կասկած անգամ չկա, որ թագը մորից կփոխանցվի որդուն:
Վերջին տարիներին թագուհին Չարլզին տալիս է միապետությունը ներկայացնելու ավելի ու ավելի մեծ լիազորություններ: 2012-2013թթ. Ուելսի արքայազնը մասնակցել է 657 պաշտոնական այցի ու ընդունելության, որից 154-ը՝ արտերկրում:
Այսօր նա պաշտոնական այց կկատարի Շրի Լանկա, որտեղ վաղը կկայանա Համագործակցության գագաթնաժողովը: Միջոցառումներ չեն նախատեսվում:
