Շենգավիթ վարչական շրջանի ընդհանուր իրավասության դատարանում Ալեքսանդր Ազարյանի նախագահությամբ ավարտվել է Վաչագան Սուքիասյանի գործի դատավարությունը:
Ըստ դատական ակտի՝ Վաչագան Սուքիասյանը 2013 թվականի հունվարից մինչև մայիս օրական 10 հազար դրամ վարձատրության դիմաց թույլատրել է մարմնավաճառուհի Էմմա Մ.-ին նստել իր անձնական օգտագործման «ՎԱԶ-21010» մակնիշի մեքենան, շրջել Երևանի Լենինգրադյան փողոցով և Բագրատունյաց պողոտայում գտնվող Երևանյան լճի տարածքում:
Օրվա ընթացքում Էմման պարբերաբար զբաղվել է մարմնավաճառությամբ և յուրաքանչյուր հաճախորդի սպասարկումից հետո Սուքիասյանին վճարել է ևս հազար դրամ:
Այսպիսով, ըստ դատական ակտի՝ Սուքիասյանը նպաստել է պոռնկությամբ զբաղվելուն: Նրան մեղադրանք է առաջադրվել ՀՀ քրեական օրենսգրքի 262 հոդվածի 1-ին մասով:
Դատարանում Վաչագան Սուքիասյանը միջնորդել է իր գործը քննել արագացված ընթացակարգով:
Դատարանը Վաչագան Սուքիասյանին մեղավոր է ճանաչել ու դատապարտել 400 հազար դրամ տուգանքի: Այնուհետև նրա նկատմամբ համաներում է կիրառել և ազատել նշանակված պատժի կրումից՝ տուգանքի վճարումից:
