Ազգային ժողովի ՀԱԿ խմբակցության պատգամավոր Գագիկ Ջհանգիրյանը նոյեմբերի 13-ին Կառավարության հետ հարցուպատասխանի ժամանակ ՀՀ վարչապետ Տիգրան Սարգսյանին դիմեց «անվտանգ հարցով». ԱԺ հինգերորդ գումարման անցած նստաշրջանի ընդունված օրենքների մոտ 90 տոկոսը Կառավարության կողմից է մշակված, ԱԺ-ն ունենալով քաղաքական մեծամասնություն, օգտվելով Սահմանադրության և կանոնակարգ օրենքով սահմանված լծակներից, թույլ է տվել, որ Կառավարությունը յուրացնի օրենսդիր իշխանությունը և ինքը թելադրի ոչ միայն ընդունվող օրենքների բովանդակությունը, այլև հերթականությունը:
Վարչապետը համաձայնեց Ջհանգիրյանի հետ՝ նշելով, որ օրենքների հաճախակի փոփոխությունն իրոք լավ չէ: «Այդ հարցին մենք մեկ անգամ էլ ենք ԱԺ-ում անդրադարձել, պետք է ունենալ այնպիսի օրենքներ, որոնց փոփոխությունը հետագայում հասցնենք մինիմումի: Դա նշանակում է, որ պետք է էապես բարելավենք մեր կարողությունները օրինաստեղծ համակարգում և կարող ենք հաջողության հասնել: Բայց մեզ նման պետությունները, որոնք դեռևս նոր են ձևավորում ինստիտուտներ, չունեն ավանդույթներ, որովհետև հասարակությունը գտնվում է բարդ տրանսֆորմացիայի փուլում, անհնար է՝ փոփոխություններ չլինեն: Եթե փոփոխություններ չես անում, նշանակում է՝ չես անդրադառնում ժամանակակից մարտահրավերներին»,-ասաց նա՝ միաժամանակ նշելով, որ այդ փոփոխությունները պետք է հասնեն նվազագույնի։
Օրենսդրական նախաձեռնություններն, ըստ վարչապետի, ոչ միայն ՀՀ կառավարության նախաձեռնությունն են, այլև իրենց քաղաքական թիմինը։ Սարգսյանի խոսքով՝ չի կարելի ասել՝ Կառավարությունն ինչ-որ առումով գերազանցում է կամ ճնշում ԱԺ-ին։ Նա նշեց, որ միշտ կա օրինաստեղծ մասնագետների տեղափոխությունը Կառավարությունից ԱԺ։
