Վիետնամում ամուսնական դավաճանությունների խնդիրն այնքան սուր է, որ դրա վրա ուշադրություն են դարձրել նույնիսկ երկրի կառավարությունում և փորձում են շտկել իրավիճակը: Իշխանություններն առաջարկում են տուգանել կանանց և ամուսիններին, ովքեր դավաճանում են իրենց զուգընկերներին կամ զուգընկերուհիներին:
Համապատասխան կառավարական հրամանագիրն ուժի մեջ է մտել նոյեմբերի 11-ին՝ հաղորդում է BBC-ն: Ըստ հրամանագրի՝ դավաճան ամուսինները կտուգանվեն 45-145 դոլար:
Տեղի մամուլը ենթադրում է, որ հեռանկարում դավաճան ամուսինները կարող են նույնիսկ քրեական պատիժ կրել, եթե նրանց արտամուսնական կապը «լուրջ հետևանքներ» է ունեցել: Վիետնամի իշխանությունները «լուրջ հետևանքներ» ասելով ի նկատի ունեն ընտանիքի փլուզումը կամ խաբված ամուսիններից մեկի ինքնասպանությունը:
Վիետնամցիները ստիպված կլինեն համանման տուգանք վճարել նաև անչափահասների հետ ամուսնության դեպքում: Տուգանք նախատեսված է նաև ամուսնական այն զույգերի համար, որոնք ամուսնալուծվում են՝ շրջանցելու համար ընտանիքում երեխաների թվի վրա դրված պետական սահմանափակումները:
Ինչպես հաղորդում է BBC-ն, տուգանքի նման համակարգը կարող է լինել այն միջոցներից մեկը, որոնցով վիետնամական էլիտան ցուցադրում է հոգատարություն ժողովրդի բարոյականության հանդեպ: Նախորդ տարի Վիետնամի կոմունիստական կուսակցության գլխավոր քարտուղարն արշավ է սկսել կառավարության պաշտոնյաների, կուսակցության անդամների և բնակչության լայն շերտերի «կոռումպացված կենսակերպի դեմ»:
